“Shkarkimi i Presidentit”/ Komisioni i Venecias sot në Tiranë, ja axhenda e takimeve

Një delegacion i Komisionit të Venecias, në misionin fakt mbledhës për shkeljet e pretenduara të Presidentit të Republikës, Ilir Meta, në vendimin për të anuluar 30 qershorin si datë për zgjedhjet lokale, sot pritet të zhvilloi takime me përfaqësuesit politik dhe institucional në Tiranë.

Takimin e parë, delegacioni i Komisionit të Venecias do ta zhvillojë në orën 08:00 të mëngjesit, me përfaqësuesit e opozitës Oerd Bylykbashi dhe Klajda Gjoshën.

Më pas, në orën 09:00 vijon takimi me kryetarin e Grupit Parlamentar të PS, Taulant Balla dhe deputetë anëtarë të Grupit.

Delegacioni i Komisionit të Venecias më pas do të takojë Kryetarët e Grupeve Parlamentare të “Opozitës së Edi Ramës”, Rudina Hajdari, Nimet Musai, Adriatik Alimadhi dhe deputetë anëtarë të grupeve, për të vijuar me një takim rreth mesditës me Kryetarin e Parlamentit, Gramoz Ruçi.

Ndryshe, Komisioni Hetimor parlamentar për shkarkimin e Presidentit i krijuar pas iniciativës së mazhorancës socialiste është shprehur se pret një përgjigje nga Komisioni i Venecias në mënyë që të marrë dhe vendimin përfundimtar për Ilir Metën, të cilin e akuzon se ka shkelë Kushtetutën me vendimin për të anuluar datën e zgjedhjeve, 30 Qershor.