Presidenti Trump: Bisedimet me talibanët janë të vdekura!

Presidenti i Shteteve të Bashkuara, Donald Trump, tha se bisedimet me talibanët, për t’i dhënë fund luftës 18-vjeçare në Afganistan, janë të vdekura.

“Sa më përket mua, ato janë të vdekura,” tha Presidenti Trump para gazetarëve në Shtëpinë e Bardhë.

Në fundjavë, presidenti amerikan e anuloi një plan sekret për të pritur një delegacion të talibanëve në SHBA, pasi grupi militant pranoi se ka vrarë një ushtar amerikan.

Dy palët janë dukur se janë pranë një marrëveshjeje dhe talibanët janë shprehur se SHBA do të humbasë më së shumti” nga anulimi i bisedimeve, raporton RFE.

Presidenti Trump e ka bërë tërheqjen e trupave amerikane nga Afganistani prioritet në politikën e jashtme. Por, i pyetur për 14.000 ushtarët amerikanë që ndodhen ende atje, Trump tha:

“Do të donim të dilnim, por do ta bëjmë këtë në kohën e duhur.”

Presidenti Trump u kritikua për mundësinë e pritjes së talibanëve në SHBA, vetëm disa ditë para përvjetorit të sulmeve të 11 shtatorit.

Megjithatë, presidenti e mbrojti idenë, duke thënë se takimet janë një gjë e mirë dhe jo një gjë e keqe.