Vrau Nard Polinë në Shkodër, ekstradohet nga Danimarka…
Kapet dhe ekstradohet nga Danimarka 27-vjeçari nga Shkodra, i dyshuar për vrasjen e Nard Polisë, i njohur ndryshe si Nardi i Bujtinave.
Interpoli bën me dije se “nga Specialistët e Interpol Tirana u krye ekstradimi nga Kopenhagen/Danimarkë, i shtetasit shqiptar K. S., 27 vjeç, banues në Shkodër”.
Sipas Interpol, shtetasi Kristjan Sulaj, alias Kristjan Martini ishte shpallur në kërkim ndërkombëtar nga ZQK Interpol Tirana, pasi Gjykata e Rrethit Gjyqësor Shkodër, më datë 27.03.2019, ka caktuar masën e sigurisë ”Arrest në burg”, për veprën penale “Vrasja me dashje, në bashkëpunim.
Ky dyshohet se është autori kryesor që ka bërë ekzekutimin. Ndërkohë që kujtojmë se në burg për këtë krim janë tre persona, që u arrestuan pak pas ngjarjes së rëndë.
Në burg është edhe i vëllai i të riut që u ekstradua nga Danimarka, Alfred Martini.
Ndryshe, shtetasi K. S. është autori i dyshuar i ngjarjes së ndodhur më datë 20.03.2019, ku në vendin e quajtur kryqëzimi i fshatit Grudë, Njësia Administrative Rrethina, Shkodër, është vrarë me armë zjarri në automjetin e tij shtetasi N.P.
Si rezultat i bashkëpunimit të Interpol Tirana me Interpol Kopenhagen, u bë i mundur arrestimi i tij në Danimarkë, duke u finalizuar me ekstradimin drejt vendit tonë.
