Atentati ndaj Lul Berishës/ Në gjykatë, Ahmet Ajeti: Na mbyllën në një hotel…

Sot në Gjykatën e Krimeve të Rënda ka dëshmuar Ahmet Ajeti, shqiptari nga Kosova i akuzuar për atentatin ndaj Lulzim Berishës në vitin 2005.

Ahmet Ajeti, i dënuar për tentativë vrasje ndaj Lul Berishës, ka mohuar akuzën përball Gjykatës për Krime të Rënda.

Ajeti po rigjykohet, pasi më herët është dënuar me 20 vite burg. Për më shumë se dy orë, kosovari ka treguar se në Tiranë kishte ardhur për punë bashkë me Osman Korpuzin dhe kur kishin kërkuar punë në një hotel, dy persona e kanë kontaktuar dhe thënë se kishin punë për ta.

Më tej, vazhdon Ajeti, këta persona i kanë mbyllur në një hotel në Durrës, ku i kanë thënë se duhet të vrisnin një person për ta, ose ndryshe nuk do largoheshin më.

“Për të shpëtuar nga kjo situatë unë kam plagosur veten,” shtoi Ajeti, i cili mohoi të njihte Lul Berishën, për të cilin tha se e kishte parë për herë të parë në gjyq, si dhe shtoi se nuk njeh asnjë nga personat që përmenden nga Prokurori dhe që janë dënuar si pjesë e bandës së Durrësit.