Ndërron jetë gazetarja Ardita Sylejmani

Sot në moshën 32 vjeçare ka ndërruar jetë gazetarja e Radio Televizionit të Kosovës, RTK, Ardita Sylejmani.

Duke i shprehur ngushëllime familjes Sylejmani, familjes Bllaca si dhe kolegëve të  Radio Televizionit të Kosovës, Drejtori i Përgjithshëm i RTK-së, Ngadhnjim Kastrati, thekson se me pikëllim të thellë morën lajmin për ndarjen nga jeta të koleges, gazetares së dhomës së lajmeve Ardita Sylejmani Bllaca:

“Ardita dha një kontribut të madh në RTK gjatë tërë kohës sa ka punuar në dhomën e lajmeve. Prandaj, humbja e saj është humbje e madhe për Radio Televizionin e Kosovës.”

Ndërsa Asociacioni i Gazetarëve të Kosovës duke shprehur ngushëllime për ndarjen nga jeta të gazetares së RTK-së, Ardita Sylejmani Bllaca, bënë të ditur se vdekja e gazetares ka ardhur si pasojë e komplikimeve gjatë lindjes.

Njoftimi i AGK-së:

Asociacioni i Gazetarëve të Kosovës me trishtim të thellë ka pranuar lajmin për ndarjen e parakohshme nga jeta të gazetares Ardita Sylejmani Bllaca.

Kjo vdekje e papritur ka tronditur shumë njerëz, jo vetëm ata që e njihnin personalisht, por edhe ata që e njohën vetëm nga ekrani.
Sylejmani Bllaca së fundmi ka punuar në Radio Televizionin e Kosovës. Për vite me radhë shërbeu me korrektësi dhe pasionin e një gazetareje model dhe me ambicie, andaj edhe do të lë gjurmë të përhershme në fushën e gazetarisë.

Vdekja e gazetares Sylejmani Bllaca, e cila la pas vetes 3 fëmijë, ka ardhur si pasojë e komplikimeve gjatë lindjes. Në emër të AGK-së dhe komunitetit të gazetarëve, shprehim ngushëllimet më të sinqerta për familjarët, të afërmit dhe miqtë e së ndjerës.