“Liri për Saimir Tahirin”, Luigi Soreca i bashkohet heshtjes rilindase!

Ambasadori i BE në Tiranë, Luigi Soreca, mbështeti Qeverinë dhe Edi Ramën edhe në heshtjen pas vendimit kriminal të Gjykatës së Krimeve të Rënda për lirimin e Saimir Tahirit i cili akuzohej për organizimin e Grupit të Strukturar Kriminal:

“Si ish-prokuror, nuk mund të komentoj pa lexuar dosjen. Më lejoni të lexoj një herë vendimin dhe pastaj do flas!”

Duke ju bashkuar kështu bandës rilindase që nuk ka bërë as edhe një koment edhe pse kanë kaluar 12 orë nga vendimi i Gjykatës së Krimeve të Rënda, i cili trafikantin ndërkombëtar të drogës e konvertoi në kopshtar të Erion Velisë, prokurori italian dhe aktualisht Shefi i Zyrës së BE në Tiranë e bëri të paditurin e dosjes edhe pse shqiptarët skeptik ndaj akuzave për Ish-Ministrin e Brendshëm, vetëm nga dosja e ardhur nga Italia e kuptuan se Saimir Tahiri me ca kusherinjë budallenj ka trafikuar drogë, u ka shitur makinën dhe e ka përdorë atë, u ka marrë jahtin budallenjëve dhe ka konfirmuar aftësitë e tij lundruese prej skafisti ndërsa lejen për lundrim e ka shoqëruar me 860 mijë euro, jo që ato të jenë më të sigurta gjatë transportit por që leja prej kapiteni të anijes në emër të Saimir Tahirit të jetë më e vlefshme.

Kur do të flas Luigi Soreca ai e din më së miri, por Reforma për Drejtësi të cilës i doli për zot Bashkimi Evropian, Ambasadorë i së cilës është prokurori i njohur italian, mbrëmë është bërë nul.

Si prokurorët e çështjes që kanë kaluar vettingun, Vladimir Mara, Dritan Prençi dhe Arens Çela, ashtu dhe gjyqtarët që me këtë vendim pritet ta kalojnë, Flora Hajredinaj, Irena Gjoka dhe Ardit Mustafaj, nuk kanë dëshmuar me lirimin e Saimir Tahirit se Reforma në Drejtësi është kot sepse këtë e ka ditur çdo shqiptar; Por kanë konfirmuar se Reforma në Drejtësi i ka shërbyer dhe po i shërbën mikut të Sorecës; Atij për të cilin Ambasadori i BE heshti sot, ashtu siç heshti në korrik kur prokurorët “zhdukën” proçesverbalin italian të drejtësisë i përkthyer në gjuhën shqipe, i cili fliste mbi lidhjen e Habilajve me Saimir Tahirin.

Jo për të shpëtuar Saimir Tahirin, këtë nuk mund ta thotë njeri, por mikun e tij Edi Rama, i cili ndër shumë mëkatet që i serviri këtij vendi është dhe Ministri i Brendshëm me kusherinjë budallenj, Saimir Tahiri!

Në fund po japim dhe vendimin e zbardhur të Gjykatës së Krimeve të Rënda i cili nga burgu e çon Saimir Tahirin kopshtat të Erion Velisë.

Derisa Prokuroria akuzonte Tahirin për “Trafikim të narkotikëve”, në bashkëpunim, në formën e grupit të strukturuar kriminal, “Kryerja e veprave penale nga organizata kriminale” dhe “Grup i strukturuar kriminal”, për Gjykatën këto akuza nuk faktohen me prova dhe për këtë është bërë ndryshimi i cilësimit të veprës penale, duke e gjetur fajtor për “Shpërdorim detyre”.

“I pandehuri Saimir Tahiri, duke mbajtur kontakte të tilla të pashpjegueshme me Habilajt, si dhe mosmarrja e masave për kanabizimin dhe përfshirjen e Policisë në këtë fenomen, ka konsumuar veprën penale të ‘Shpërdorimit të detyrës”, tha gjyqtari, teksa lexoi arsyetimin se pse trupi gjykues kishte bërë ndryshimet.

VENDIMI

Gjykata vendosi: 1 deklarimin fajtor të të pandehurit Saimir Tahiri, për veprën penale të “Shpërdorimit të detyrës”, të parashikuar nga neni 248 i Kodit të Procedurës Penale dhe dënimin e tij me 5 vite burgim. 2. Deklarimin e pafajshëm të të pandehurit Saimir Tahiri për veprën penale të “Grupit të strukturuar kriminal”, pasi nuk provohet vepra penale që akuzohet. Të pandehurit Saimir Tahiri i ulet një e treta e dënimit dhe dënohet përfundimisht me 3 vjet e 4 muaj burgim. Urdhërohet pezullimi i vuajtjes së dënimit me burgim për të pandehurin Saimir Tahiri dhe vënien e tij në provë për një periudhë prej 3 vitesh, me kusht që gjatë kësaj kohe të mos kryejë vepër tjetër penale. Heqjen e së drejtës të pandehurit Saimir Tahiri për të ushtruar funksione publike për një kohë për tre vjet.

ARGUMENTI

Është vërtetuar se nga monitorimi i Guarda di Finanza, është konstatuar se në vitin 2016 janë kultivuar kanabis sativa në disa zona të Vlorës. Autorët e kultivimit të bimës narkotike kishin lidhje dhe bashkëpunim edhe me pjesëtarë të caktuar të Policisë së Shtetit dhe atij vendor, që lejonin aktivitetin e kultivimit të tyre. Përgjimet telefonike dhe komunikimet me mesazhe që u zbuluan nga ekspertimi i telefonit të shtetasit Taulant Haxhiraj, tregonin pjesëtarë të caktuar të Policisë flisnin në mënyrë të drejtpërdrejtë duke treguar qartë përfshirjen në këtë aktivitet.

Me vendimin 62, datë 23 prill 2018, të Gjykatës së Shkallës së Parë për Krime të Rënda që ka marrë formë të prerë, rezulton se të pandehurit Moisi dhe Florian Habilaj, në bashkëpunim me shtetas të tjerë dhe italianë, bënin trafikimin e lëndës narkotike nga Shqipëria drejt Italisë. Hetimet penale, të kryera nga autoritetet italiane, kanë vërtetuar aktivitetin e tyre në trafikim dhe nga viti 2013 në 2017 kanë arritur të sekuestrohen sasi të konsiderueshme të lëndës narkotike, të trafikuar nga Shqipëria drejt Italisë. Në vijim, nga hetimi i kryer edhe në Shqipëri ndaj këtyre shtetasve, janë sekuestruar kanabis sativa në fshatin Babicë e Vogël, Vlorë, në banesën e shtetasit Armand Koçerri. Në përgjimet ambientale të kryera nga autoritetet italiane, i pandehuri Moisi Habilaj, bashkëpunëtorët e tij dhe persona të tjerë shpesh lëviznin lirshëm dhe në veprimtarinë e tyre ata lejoheshin dhe favorizoheshin nga punonjës të Policisë së Shtetit në Shqipëri.