Vjosa Osmani: Kolonel Ahmet Krasniqin e vranë kundërshtarët e pavarësisë së Kosovës!
Kandidatja për Kryeministre e Lidhjes Demokratike të Kosovës, Vjosa Osmani, pasi bëri homazhe te varri i Presidentit, Ibrahim Rugova dhe te varri i Ish-Ministrit të Mbrojtjes, Ahmet Krasniqi, në 21-vjetorin e vrasjes së kolonel Ahmet Krasniqit tha se ai u vra pabesisht nga njerëzit që nuk e deshën pavarësinë dhe lirinë e Kosovës.
“Sot, 21 vjet më parë është vrarë pabesisht në Tiranë kolonel Ahmet Krasniqi, ministri i parë i Republikës së Kosovës, një atdhetar i shquar, një strateg ushtarak i pashoq i cili kishte përgatitjen profesionale por mbi të gjitha atdhedashurinë për të mbledhur njerëzit më të mirë të këtij vendi për të organizuar luftën çlirimtare për Republikën e Kosovës. Ai punoi me shumë shokë të tij të cilët janë sot këtu me ne dhe e njohu si Komandat Suprem, Presidentin Historik Ibrahim Rugova, për të ndërtuar celulat e para të mbrojtjes së Kosovës por për fat të keq u vra pabesisht nga njerëz të cilët ishin kundër pavarësisë së Kosovës dhe kundër lirisë.”
Me këtë rast Vjosa Osmani ka kërkuar zbardhjen e vrasjes së Ahmet Krasniqit, kjo plagë e hapur e Kosovës.
“Edhe sot pas 20 vjetëve kërkojmë të zbardhet vrasja e tij, jo vetëm pse mbetet plagë e hapur për familjen, por për shkak se është plagë e hapur për të gjithë ne dhe Republikën e Kosovës. Do tu qëndrojmë gjithmonë në krah të drejtësisë dhe asnjëherë të hakmarrjes”.
Ndryshe, sot është “Dita e Paqes”, dhe Kandidatja për Kryeministre e Lidhjes Demokratike të Kosovës, Vjosa Osmani, tha see bëmë homazhe te varri i Presidentit Historik, Ibrahim Rugova, i cili ishte simbol i paqes jo vetëm për Kosovës, por për gjithë botën sepse bëri gjithçka që ta mbrojë popullin dhe gjithë botës ti tregojë se sa atdhedashës janë populli i Kosovës.
