Nis fushatën, Veseli: Kosova është mirë vetëm kur Mitrovica është mirë

Kandidati për Kryeministër i PDK në zgjedhjet e 6 tetorit, Kadri Veseli, duke hapur fushatën elektorale tha qëllimisht ka zgjedhur Mitrovicën për të përcjellë mesazhin se Kosova është mirë vetëm kur është mirë Mitrovica.

“Jam sot këtu në Mitrovicë, në qytetin tim të dashur, në vatrën e atdhedashurisë, në djepin e Isa Boletinit, në vendin që më frymëzoj e ku nisa rrugëtimin tim jetësor. Unë jam sot këtu në Mitrovicë, si biri juaj, për ta nisur me këmbë të mbarë këtë rrugëtim të ri të Kosovës dhe për të filluar suksesshëm fitoren e madhe të PDK-së. Kam zgjedhur Mitrovicën për ta përcjellë qartë dhe fuqishëm mesazhin e Kosovës dhe PDK-së se Kosova është mirë vetëm kur Mitrovica është mirë. E Kosova e Mitrovica janë mirë, kur ky vend i bekuar nga Zoti zhvillohet e ndërtohet më shumë e kur qytetarët janë më të kënaqur me jetën dhe shtetin e tyre. Jam këtu për të bërë hapin e parë drejt 6 tetorit,” tha Kadri Veseli duke e bërë të qartë:

“S’ka çmim për liri, e s’ka çmim për Mitrovicën. Mitrovica do të jetë përherë një.”