Vjosa Osmani në Rogovë: Fitorja e LDK-së, i mbanë afër miqtë ndërkombëtarë

Kandidatja për Kryeministre e Lidhjes Demokratike të Kosovës, Vjosa Osmani, në Rogovë tha se vetëm me fitoren e LDK-së në zgjedhje, Kosova i mbanë afër miqtë tanë ndërkombëtarë.

“Ne jemi të sigurt që do të fitojmë, por na duhet fitorja e madhe sepse sigurohemi se i mbajmë miqtë tanë shpëtimtarë. Vetëm kur fitorja e LDK-së është e madhe sigurohemi se Kosova jonë më nuk zbrazet nga të rinjtë,” tha Osmani duke shtuar:

“Më 6 tetor e tutje do t’ju tregojmë secilit, edhe atyre nga partitë e tjera politike, se unë do të jem kryeministre e të gjithë qytetarëve të Kosovës, pavarësisht për kënd kanë votuar.”

LDK, tha Vjosa Osmani me këtë rast, nuk e ka ndërmend me amnistua krimin.

“E dinë shumë mirë se LDK-ja nuk e ka ndërmend me qeveris me të korruptuarit. E dinë shumë mirë se më 7 tetor, një ditë pas zgjedhjeve, ne të gjithë do të zgjohemi në një Kosovë ndryshe, në një Kosovë me të cilën secili prej jush do të krenohet dhe për këtë zotohemi para secilit.”

Krejt Kosova është LDK, është e bindur kandidatja për kryeministre dhe kushdo që ka pasur dyshim, e ka marrë përgjigjen mbrëmë.

“Përgjigjen finale që krejt Kosova është LDK kanë me marrë me 6 tetor!”