Më 6 Tetor, Osmani: Fitore të thellë ka me pa krejt Kosova!

Kandidatja për Kryeministre e LDK-së, Vjosa Osmani, tha se kur Ferizaji vendos që të fitojë, s’ka kush që e ndalë LDK-në.

“Është kënaqësi të kthehem prapë këtu në mesin tuaj në këtë ditë të bukur me diell për të përjetuar së bashku me të gjithë ju shkëlqimin e sigurt të fitores tonë e cila tashmë është e pastër sikur rrezja e diellit të ditës së sotme,” tha Osmani nga qyteti i Ferizajit duke konstatuar se LDK është me e bashkuar se kurrë më parë.

Duke folur për çështjen e kufijve, Vjosa Osmani tha se LDK mbron idenë e presidentit Ibrahim Rugova për krijimin e një shteti që e respekton angazhimin e secilit.

“Presidenti Ibrahim Rugova e donte një Republikë të Kosovës të cilës askush nuk ja cenon kufijtë, shtetësinë dhe një Republikë të tillë e siguron dhe e garanton vetëm LDK-ja,” tha kandidatja pēr Kryeministre, Vjosa Osmani e bindur se LDK do të dalë fituese më 6 tetor.

“Fitore dhe jo vetëm fitore, por fitore të thellë kanë me pa më 6 tetor krejt Kosova.”