Beograd, grup koordinues për vendkalimin kufitar Miratoc- Llojan

Qeveria e Serbisë ka marrë vendim për formimin e një grupi koordinues për hapjen e vendkalimit kufitar Miratoc- Llojan, mes Serbisë dhe Maqedonisë së Veriut.

Detyra e këtij grupi koordinues, siç theksohet në dokumentin e publikuar në Fletoren zyrtare është “të ndërmerr të gjitha masat dhe aktivitetet për plotësimin e kushteve të nevojshme në hapjen e vendkalimit kufitar Miratoc- Llojan”, raporton Agjencia maqedone e lajmeve MIA.

Shqiptarët e Preshevës dhe ata të Llojanit, me vite të tëra kërkojnë hapjen edhe të një vendkalimi Maqedoni e Veriut-Serbi.

Tetë vite më parë, mijëra banorë në Miratoc të Komunës së Preshevës kanë kërkuar nga qeveria e Maqedonisë dhe Serbisë të sjellin vendim për hapjen e vendkalimit kufitar. Arsyeja për këtë siç theksohet është që shumë prona dhe të afërm, pas vendosjes së kufijve të ri shtetëror mes Serbisë dhe Maqedonisë së Veriut, kanë mbetur në anën e kundërt të kufirit.

Ndryshe, distanca mes fshatrave Llojan dhe Miratoc është tre kilometra, por banorët e Llojanit duhet të udhëtojnë deri në 33 km që të arrijnë deri në Miratoc, përmes vendkalimit kufitar Tabanoc- Preshevë.

Për mbylljen e këtij vendkalimi kanë folur edhe kryeministrat e dy vendeve, Zoran Zaev dhe Ana Bërnabiç, në gusht të këtij viti me rastin e hapjes së vendkalimit kufitar Tabanoc-Preshevë.