Exit Poll: Vetëvendosje fituese e zgjedhjeve

Pas mbylljes së qendrave të votimit, Instituti i Prishtinës për Studime të Opinionit Publik, PIPOS, ka publikuar në televizionin publik të Kosovës, RTK, Exit Poll-in për epilogun e zgjedhjeve të parakohshme të mbajtura, sot, për Parlamentn e Republikës së Kosovës.

Udhëheqësi i institutit PIPOS, Fisnik Halimi, para prezantimit ka sqaruar mënyrën se si është realizuar ky Exit Poll.

Ai tha se kjo është një teknikë e matjes së shpejtë të rezultateve, e cila realizohet përmes intervistave gjatë ditës, të cilat ky institut i merr menjëherë pasi qytetarët e kryejnë obligimin e tyre në vendvotime.

“Kjo teknikë realisht është shumë e saktë, por i ka mangësitë e veta dhe duhet marrë me një dozë të vogël rezerve. Por, ne, si PIPOS i kemi marrë të gjitha parapërgatitjet që marxhina e gabimit të jetë minimale dhe të pasqyrojë rezultatin ashtu siç do të jetë pas numërimit.”

Ndërkohë, në bazë të këtij Exit-Polli fitues i zgjedhjeve del të jetë Lëvizja Vetëvendosje me 28.1 përqind të votave, e pasuar nga LDK me 27.9 përqind dhe PDK me 25.8 përqind.

Ndryshe Exit Pollet janë rezultatet jozyrtare dhe që realizohen në bazë të anketave. Në bazë të ligjit institucioni që ka të drejtë të publikojë rezultatet e zgjedhjeve në Kosovë është vetëm Komisionin Qendror Zgjedhor.