VIDEO/ Zhgënjen Shqipëria në miqësoren me Kosovën, shkëlqejnë Zeneli e Zhegrova

Sulmuesit Arbër Zeneli dhe Edon Zhegrova treguan klasin e tyre, në fitoren e kombëtares së Kosovës me rezultat 3:0 ndaj Shqipërisë. Ndeshja miqësore u luajt në stadiumin “Letzigrund” në Zurich të Zvicrës.

Lojtarët e Kosovës në çdo aspekt ishin më mirë sidomos më agresivë në vijën e sulmit. Rreth 20 mijë shikues ishin të pranishëm në këtë miqësore, ku Shqipëria zhgënjeu.

Numër i madh i tifozëve të veshur me ngjyrën kuq e zi, me brohoritjet e tyre, besa, besë, Kosova, Kosova, Shqipëria, Shqipëria, krijuan atmosferë madhështore.

Në minutën e 14-të, Milot Rashica harkoi në 16-sh, por Vedat Muriqi nuk finalizoi. Në minutën e 21-të, Besar Halimi jashtëzakonisht i zgjuar, ka vërejtur mbrojtjen e përgjumur të kombëtares shqiptare, duke shërbyer Arbër Zenelin, i cili nga rreth 10-11 metra me goditje të saktë e të fortë shënoi për 0:1.

Në fund të pjesës së parë, Mërgim Vojvoda kërcënoi portën e Shqipërisë, pasi harkimi i tij gati sa befasoi portierin Berisha. Kështu që, në 45 minutat e parë të takimit Kosova ishte më kërkuese, më kërcënuese, ndërsa sulmuesit e Shqipërisë nuk ishin në ritmin e duhur.

Në minutën e 51-të, sulmuesi Arbër Zeneli me një depërtim mjeshtëror, nga rreth 15 metra me goditje të fortë në të djathtën ka shtangur portierin Etrit Berisha, 0:2.

Kosova gati trefishoi epërsinë në minutën e 66-të. Talenti i madh Edon Zhegrova me të majtën e tij gati sa shënoi por portieri Etrit Berisha shpëtoi portën e tij.

Në minutën e 67-të, Edon Zhegrova nga rreth 20 metra dërgoi me një goditje mjeshtërore e befasuese për Berishën, thelloi fitoren në 0:3.

Zeneli pati rast ideal, por Etrit Berisha shpëtoi Shqipërinë pikërisht në minutën e 74-të. Në minutën e fundit, Taipi me një goditje nga rreth 16 metra goditi shtyllën pingule të Shqipërisë.

Trajneri i kombëtares së Kosovës, Bernard Challandes, aplikoi një lojë të disiplinuar sidomos me një mbrojtje të fortë dhe me sulme të shpejta, që disa herë e vunë në sprovë mbrojtjen e Shqipërisë.
Christian Panucci, përzgjedhës i Shqipërisë, mbetet i befasuar me lojën e mençuar të rivalit dhe i dëshpëtuar me lojtarët e tij.

Shqipëria-Kosova 0:3

Stadiumi “Letzigrund”, Zurich.

Shikues: 20.000.

Shënues: Zeneli (21′ e 51′), Zhegrova (67′).

Kartonat e verdhë: Roshi, Lika – Ujkani, Krasniqi.

Shqipëria: Berisha, Hysaj, Veseli, Lika, Ndoji, Ramadani, Qaka, Roshi, Guri dhe Cikalleshi. Luajtën edhe Manaj, Lilaj, Abazaj, Balaj, Mavraj.

Kosova: Ujkani, Aliti, Ismajli, Rrahmani, Vojvoda, Shala, Halimi, Zeneli, Avdijaj, Rashica dhe Muriqi. Luajtën edhe Nuhiu, Zhegrova, Taipi, Krasniqi, Ber. Berisha, Përdedaj