LDK: Negociatat me Vetëvendosjen vazhdojnë pas certifikimit të rezultateve
Kryesia e LDK-së ka marrë vendim që negociatat me Vetëvendosjen të vazhdojnë pas certifikimit të rezultateve të zgjedhjeve të 6 tetorit, tha zëdhënësi i LDK-së, Besian Mustafa, pas mbledhjes së Kryesisë.
Por kandidatja e LDK për kryeministre Vjosa Osmani, tha se nuk është ndalur procesi i negociatave me Lëvizjen Vetëvendosje, për afrimin e programit të përbashkët qeverisës.
Ndërsa për deklaratat e Nënkryetarit tjetër të LDK-së, Agim Veliu, që u shpreh kundër koalicionit me Vetëvendosjen, Nënkryetarja Osmani ajo ngeli e habitur:
“Për besë nuk e di për çfarë deklaratash bëhet fjalë, por disponimi në Kryesi ka qenë shumë i mirë dhe nuk ka pasur asnjë vendim për të ngrirë bisedimet me LVV-në. Do të vazhdojnë bisedimet për program. LDK në këto zgjedhje ka marrë rezultatin më të mirë prej vitit 2004.”
Grupet e punës tha Vjosa Osmani do të varen nga temat sektoriale.
“Ne e kemi një ekip që e kemi krijuar, e që ka diskutuar para zgjedhjeve, Avdullah Hoti, Kujtim Shala, Lumir Abdixhiku. Por varësisht nga temat, p.sh për drejtësi i kemi juristët, për ekonomi ashtu, për arsim. Na duhet harmonizim për disa tema të rëndësishme,” tha Osmani pas takimit që së bashku me kryetarin e LDK-së, Isa Mustafa, zhvilloi me deputetin e CDU-së në Bundestag, Volkmar Klein.
