10 vjet Konrad Adenauer/ Thirrje, Basha: Të hapet rruga e Shqipërisë, e bllokuar nga Edi Rama!

Kryetari i Partisë Demokratike, Lulzim Basha, në ceremoninë e 10-vjetorit në Shqipëri të Fondacionit Konrad Adenauer e cilësoi si avokatin më të madh të integrimit të vendit tonë dhe të hapjes së negociatave për në BE ndërsa i kërkoi sërish miqve gjermanë që të hapin rrugën e integrimit të Shqipërisë e cila është bllokuar nga rilindja e Edi Ramës.

“10 vjetori i themelimit të Fondacionit Konrad Adenauer përkon me një moment historik për vendin tim, marrjen e vendimit për nisjen e bisedimeve për anëtarësim në Bashkimin Europian. Nuk njoh ndonjë organizëm tjetër në Shqipëri, që të ketë ndihmuar më shumë shqiptarët të ecin përpara në këtë proces sfidues, sesa Fondacionin Konrad Adenauer. Është edhe për shkak të ekspertizës dhe mbështetjes së pakursyer të Fondacionit, të ndikimin e tij pozitiv në Berlin, që Shqipëria ka mbështetjen e plotë të Gjermanisë për të vazhduar rrugën e saj drejt Europës.

Prandaj, më lejoni që, në emër të Partisë Demokratike dhe të opozitës të shpreh mirënjohjen time të thellë për Fondacionin “Konrad Adenauer”. Ju falënderoj përzemërsisht i dashur President Lammert. Përfitoj nga rasti t’ju falënderoj, personalisht, për mbështetjen e vazhdueshme tuajën, për ndihmën e paçmuar që i keni dhënë Shqipërisë, që kur shërbenit si President i Bundestagut, për ratifikimin e Marrëveshjes së Stabilizim – Asociimit, rreth 10 vjet më parë.

Duke falendëruar drejtuesit e Fondacionit në Shqipëri dhe partinë tonë simotër, CDU-në, për ndihmën e jashtëzakonshme që i ka dhënë Shqipërisë dhe Partisë Demokratike, lideri i opozitës i kërkoi sërish miqve gjermanë që të bëjnë çka është e mundur që Shqipëria të hapë rrugën e integrimit, bllokuar prej keqqeverisjes së rilindjes.

“Ndërsa kremtojmë këtë 10 vjetor, Shqipëria është në një udhëkryq të pamerituar, për shkak të keqqeverisjes së saj. Vendet skeptike ndaj nesh janë shtuar, por për fatin e mirë të Shqipërisë, në këtë proces të një rëndesie jetike për vendin, për shqiptarët, nuk na ka munguar mbështetja e CDU-së, e Kancelares Merkel, e Bundestagut, këmbengulja e miqve tanë, ku dua të veçoj Johann David Wadephul, Gunther Krichbaum dhe Hans Joachim Falenski.

Ne u bëmë thirrje miqve tanë gjermanë që, megjithë gjendjen e rëndë në vend, shkaktuar nga hapat prapa në lidhje me ekonominë, demokracinë, sundimin e ligjit dhe lirinë e shprehjes, vetëm hapja e negociatave garanton nje vemendje të shtuar të Bashkimit Europian në Shqipëri, një kontroll më të fortë të funksionimit të institucioneve, ndarjes së pushteteve, zgjedhjeve të lira dhe barazisë para ligjit, si garanci për qytetaret e këtij vendi se liritë dhe të drejtat e tyre do të respektohen.”

Sot, kur falë qëndrimit të drejtë dhe parimor dhe mbështetjes së fortë të Kancelares Merkel dhe CDU për Shqipërinë, Bundestag ka propozuar rrugën drejt hapjes së negociatave, që është edhe udhërrëfyesi për daljen nga kjo krizë, thënia e Konrad Adenauer se ”Demokracia nuk mund të merret kurrë si e mirëqenë”, thekson Lulzim Basha, është më aktuale se kurrë më parë.

“Ndaj, unë jam plot besim se bashkë me shqiptarët dhe me ndihmën e miqve tanë, do t’ia dalim ta bëjmë Shqipërinë si Europa.

Me ndihmen e madhe të Fondacionit “Konrad Adenauer” dhe te mikut tim Walter Glos, ne kemi sot programin ekonomik që do ta nxjerrë vendin nga kriza dhe do t’i japë zhvillim ekonomik, kemi të rinj dhe të reja të mirë-trajnuar dhe që jane gati të marrin përsipër sfidat e qeverisjes, po modernizojmë partinë tonë e po vendosim piketat e qeverisjes së nesërme, një qeveri të njerëzve, nga njerëzit dhe që punon për njerëzit.

Jam i bindur se me ndihmen e Tobias Ruttershof, Florian Feirabend, Fondacionit Konrad Adenauer dhe mbështetjen e CDU-së do t’u japim shqiptarëve zhvillimin që meritojnë, të ardhmen që presin,” tha Kryetari i Partisë Demokratike, Lulzim Basha ndërsa falendëroi dhe shprehu mirënjohje për kontributin e Fondacionit Konrad Adenauer përfundoi:

“Ndihuni krenarë për çfarë keni bërë për Shqipërinë dhe shqiptarët. Ne jemi krenarë që jemi partnerët tuaj me misionin për ta bërë Shqipërinë si Europa!”