Europa ka refuzuar Edi Ramën, jo Shqipërinë, Basha: Ne kemi vetëm një rrugë…
Ne kemi vetëm një rrugë drejt së ardhmes dhe kjo është rruga evropiane. Europa ka refuzuar Edi Ramën, jo Shqipërinë. Kështu u shpreh Kryetari i Partisë Demokratike, Lulzim Basha, pas vendimit të Këshillit Evropian për të mos çelë negociatat me Shqipërinë duke vlerësuar e ky është dështim i Edi Ramës, jo i Shqipërisë, dhe ky mesazh ka qenë më i fortë se kurrë nga Gjermania që i tha Po Shqipërisë dhe JO qeverisë përmes 9 kushteve që duhen përmbushur.
Vlerësim sipas meritës, tha Lulzim Basha, është qëndrimi i prerë i vendeve anëtare për vendet që duan t’i bashkohen BE-së. Shumica e vendeve ishin të një mendje se qeveria e Shqipërisë nuk e meritonte hapjen e negociatave. Për këtë u artikuluan disa kushte që ne thelb tregojnë se qeveria ka bërë hapa pas nga viti në vit.
“Krimi dhe korrupsioni janë shqetësim për vendet e Bashkimit Europian. Ndëshkimi i blerjes së e votës, funksionimi i gjykatave të larta të vendit, vënia para drejtësisë e të inkriminuarve dhe korruptuarve në nivele të larta janë kërkesat e panegociueshme për hapjen e negociatave.”
Këto nuk janë probleme të Bashkimit Europian siç deklaron propaganda e drejtuar nga kryeministri aktual, konstaton lideri i opozitës por janë probleme të qeverisjes së tij.
“Krejt e ndryshme paraqitet situata për Maqedoninë e Veriut. Asnjë kusht për këtë vend dhe një mbështetje gati unanime për hapjen e negociatave. Megjithatë kryeministri Zaev paraqiti dorëheqjen, i riktheu mandatin qytetarëve dhe vendi do të shkojë në zgjedhje të parakohshme parlamentare.”
Nga ana tjetër, tha ai, qeveria jonë e cila është refuzuar nga vendet europiane, vazhdon të mos e lëshojë pushtetin, në dëm të popullit shqiptar.
“Në Europë shkohet duke ndërtuar fillimisht standartet evropiane në vendin tënd. Por kjo nuk i intereson Edi Ramës. Sepse kjo nënkupton zgjedhje të lira dhe të ndershme, ndarje të politikës nga krimi, ndarje dhe balancim të pushteteve, institucione të forta dhe të pavarura të drejtësisë.”
Të gjithë biem dakord se rruga e vetme drejt së ardhmes është rruga evropiane, tha Kryetari i Partisë Demokratike duke ritheksuar se Europa ka refuzuar Edi Ramën, jo Shqipërinë.
“Pa reforma serioze, të cilat ai nuk është në gjendje dhe nuk dëshiron ti ndërmarrë, Europa do të vazhdoje ta refuzojë Ramën, dhe ne shqiptarët, do të vuajmë pasojat. Një njeri po na mban peng të gjithëve! Kjo duhet të marrë fund. Është koha që qeveria të ndjekë shembullin e Maqedonisë së Veriut, të marrë përgjegjësinë për dështimet e saj dhe t’ia kthejë mandatin popullit shqiptar.”
Me një qeveri të re, legjitime që drejton procesin e negociatave, përparimi është i mundur. Ne jemi një popull i talentuar, i mirë arsimuar dhe punëtor, thekson Kryetari i Partisë Demokratike, Lulzim Basha, duke përfunduar:
“Ne na duhet nje qeveri e re, një qeveri që çon vendin përpara në procesin e integrimit evropian, qeveri e dalë nga zgjedhje të lira dhe të ndershme. Kushtet e BE janë udhërrëfyesi ynë për të dalë nga kriza, për ndërtuar një Shqipëri demokratike me mundësi për qytetarët e saj. Me politikat e duhura ne mund dhe do të të sigurojmë mirëqenie dhe përparim drejt të ardhmes evropiane.”
