Pas takimit me Edi Ramën/ “Shengeni Ballkanik”, Kurti: Pres ta shoh në letër!
Pas takimit me Kryeministrin Edi Rama, Kryeministri i ardhshëm i Kosovës, Albin Kurti tha se biseduan për çështjet e përbashkëta ndërsa për “Shengenin Ballkanik” tha se pret ta shoh si projekt në letër pasi për momentin, sipas tij, është në nivel idesh.
“Kishte shumë kohë pa u parë diku rreth 14 muaj. Kishte shumë tema e çështje që duhet t’i bisedonim, aq më tepër që Lëvizja Vetëvendosje si fituese e zgjedhjeve, si udhëheqëse e qeverisë së ardhshme dhe unë si kryeministri i ri dua dhe duhet të bashkëpunojmë ngushtë me qeverinë e Shqipërisë dhe me kryeministrin e Shqipërisë. Biseduam për çështje të cilat i kemi të përbashkëta por gjithashtu edhe për çështjet në dy shtetet tona. Duam që edhe në aspektin e politikës së jashtme dhe në aspektin e ekonomisë të bashkërendohen sa më shumë Kosova me Shqipërinë sepse efekti sinergjik që mund të kemi natyrisht që nuk është i shfrytëzuar sa duhet. Besoj që mundësitë që kemi si qeveri dhe nevojat që kanë qytetarët janë shumë më të mëdha se sa realiteti që e gëzojnë prandaj duam që të krijojmë sa më shumë ura dhe Kosova dhe Shqipëria dhe Shqipëria dhe Kosova t’i ndihmojnë shqiptarët që të mos jenë më të varfrit, e më të papunët e më të nëpërkëmburit jo vetëm në Ballkan”, deklaroi Kurti.
I pyetur nëse do i bashkohet të ashtuquajturit “Shengen Ballkanik”, Kurti tha se duhet ta shohë projektin në letër pasi për momentin është në nivel idesh.
“Unë pres që të shoh një tekst se çfarë saktësisht nënkupton ai. Sepse ai më ngjan më shumë me ide se sa projekte. Pra, dua ta shoh projektin në letër. Tani për tani është në nivel idesh. Ne kemi diskutuar për çështje dhe tema që do të bashkëpunojmë. Organigramat e qeverive vijnë më pas. Pra, njëherë është substanca dhe më pastaj edhe forma që duhet të marrë.”
Takimin, Albin Kurti nuk e konsideron si mundësi ku marrëdhinet me Edi Ramën u rregulluan, pasi sipas tij nuk ishin të çrregulluara:
“Ne nuk kemi pasur marrëdhënie të çrregulluara. Ne jemi njerëz të ndryshëm, jemi politikanë të ndryshëm dhe duam që të bashkëpunojmë në mënyrë që mospajtimet që kemi kurrsesi nuk bën që ta rrezikojnë bashkëpunimin tonë, meqenëse fundja ne nuk jemi dy persona të veçantë por jemi dy funksione për të cilën qytetarët tanë presin që do të bashkëpunojmë”.
Me këtë rast foli dhe për të vizitën e të Dërguarit të presidentit amerikan për dialogun Kosovë-Serbi dhe premtimeve të tij:
“Jo, ai ka ardhur që të marrë mendimin tonë se si mund të ketë marrëveshje të paqes dhe bashkëpunim në rajon. Nuk ka gjëra të tilla si këto. Periudha konkrete për fillimin e bisedimeve natyrisht që nuk mund të caktohet tani për sa kohë ne kemi nevojë për dialog me Brukselin dhe dialog me Beogradin. Duhet ta përgatisim mirë dialogun dhe unë pres që të takohem me pasardhësin e zonjës Mogherini në mënyrë që të përcaktojmë parimet se si të ecim përpara dhe dialogu i ardhshëm të mos dështojë. Për marrëveshje me Serbinë duhet të ndryshojë shumë më tepër Serbia se Kosova,” tha Albin Kurti pas takimit të cilit Kryeministri Edi Rama nuk i dha kurrfarë rëndësi, madje fotoja zyrtare e këtij takimi të cilin e publikoi Edi Rama ishte ajo me karagjozin francez, shokun e Vladimir Putinit, Gerard Depardieu.
