Vendimi, KQZ: Shkarkohet Kryetari i Bashkisë Vorë, Agim Kajmaku!

Komisioni Qendror i Zgjedhjeve, KQZ, ka vendosur të shkarkojë nga detyra Kryetarinë e Bashkisë Vorë, Agim Kajmaku.

Me pesë vota për dhe asnjë kundër sot anëtarët e KQZ vendosën shkarkimin e Agim Kajmakut pasi shqyrtuan çështjen e fshehjes në formularin e Dekriminalizimit, veprën penale të falsifikimit të parave për të cilën është dënuar në Greqi.

Ndryshe, Kryetari i Bashkisë Vorë, Agim Kajmaku fillimisht u denoncuar nga Partia Demokratike se ishte arrestuar në Greqi, nën emrin Jorgo Toto, për veprën penale të falsifikimit të parave, por që nuk e kishte paraqitur në formularin e Dekriminalizimit.

Akuzat e Partisë Demokratike u konfirmuan edhe nga Prokuroria e Përgjithshme, e cila pasi bëri verifikimin e shenjave të gishtërinjve të Kajmakut dhe shenjat e gishtërinjve të shtetasit Jorgo Toto, të arrestuar në Greqi, rezultoi se ishte personi i njëjt.

Fillimisht, Agim Kajmaku i mohoi akuzat e opozitës, duke thënë se nuk ishte arrestuar asnjëherë, por pas konfirmimit nga Prokuroria, ai publikoi vendimin e Gjykatës së Janinës, që e shpallte atë të pafajshëm, duke thënë se nuk e ka ditur për dënimin në vendin fqinj. Agim Kajmaku është kryebashkiaku i dytë i Partisë Socialiste i zgjedhur më 30 Qershor, që largohet nga detyra pas akuzave të opozitës dhe kofirmimit se kemi të bëjmë me persona me të kaluar kriminale. I pari, Kryetari i Bashkisë Shkodër, Valdrin Pjetri rezultoi i dënuar në Itali për trafik droge.

Vendimi

Tiranë më 01.11.2019
Komisioni Qendror i Zgjedhjeve, n ë mbledhjen e ditës së sotme shqyrtoi projektvendimin:

– “Shqyrtimin e rezultatit të verifikimit të Prokurorisë së Përgjithshme për funksionarin publik z. Agim Ymer Kajmaku, me funksion Kryetar i
Bashkisë Vorë, Qarku Tiranë, në zbatim të ligjit nr.138/2015 ”Për
garantimin e integritetit të personave që zgjidhen, emërohen ose ushtrojnë funksione publike”.

KQZ vendosi të shpallë të pavlefshëm dhe përfundimin e parakohshëm të
mandatit të funksionarit publik z. Agim Ymer Kajmaku, me funksion
Kryetari i Bashkisë Vorë, Qarku Tiranë.