Bie numri i miliarderëve në botë, vetëm në Amerikë jo!

Njerëzit më të pasur në botë vitin e kaluar ishin më pak të pasur, theksojnë raportet ekonomike. Në fakt, lëvizjet e ndryshme gjeopolitike dhe tregjet jo stabël të kapitalit, për herë të parë kanë shkaktuar uljen e pasurive të miliarderëve.

Në nivelin global, raportet e UBS dhe PwC tregojnë se pasuria e miliarderëve ka rënë për 388 miliardë dollarë, ulje kjo e pasurisë e cila është ndjerë në veçanti tek miliarderët kinez dhe rajoni aziatiko-paqësor.

Edhe pse vlera e kinezëve më të pasur ka rënë për 12.8 për qind, në Kinë vazhdon që çdo 2 ditë të lindë një miliarder i ri, raporton Agjencia e lajmeve Reuters.

Shikuar në aspektin global, numri i miliarderëve ka rënë kudo në botë përveç se në Amerikë.

“Ky raport tregon rezistencën e ekonomisë amerikane, ku në fund të vitit 2018 ishin 749 miliarderë,” tha eksperti financiar John Matthews, drejtues në UBS në Shtetet  e Bashkuara. “Me siguri se pasuria e miliarderëve këtë vit sërish do të rritet,” tha Drejtori i UBS në sektorin e investimeve për klientët e pasur, Simon Smiles.