Gjendet e vdekur regjisorja Arzana Kraja

Shuhet regjisorja Arzana Kraja. Policia e Kosovës, ka konfirmuar vdekjen e një vajze në lagjen “Kalabria” në Prishtinë, por mësohet se bëhet fjalë për regjisoren Kraja, vajzën e Kryetarit të Akademisë së Shkencave dhe Arteve të Kosovës, Mehmet Kraja.

“Me datën 13.11.2019 rreth orës 09:08 policia ka pranuar një informatë, për një trup të pajetë në lagjen “Kalabria”, Prishtinë. Njësitë policore kanë dalë menjëherë në vendin e ngjarjes, përfshirë edhe ekipin mjekësor të emergjencës të cilët kanë konstatuar vdekjen e personit të gjinisë femërore,” thuhet në njoftimin e policisë.

Arzana Kraja, ishte regjisore e filmit “Fusha e mëllenjave”, që shënoi edhe hapjen e edicionit të 11 të PriFest. Problemet e një të burgosuri politik shqiptar, i cili e ka vështirë të jetojë me të kaluarën, ishin shfaqur në filmin debutues të regjisores Arzana Kraja.

Ndërkohë, Qendra Kinematografike e Kosovës, e shokuar nga ky lajm ka shprehur ngushëllime.

“Jemi të shokuar nga lajmi për vdekjen e regjisores Arzana Kraja! Angazhimi i sajë në fushën e kinematografisë ishte i jashtëzakonshëm! Ngushëllime familjes, miqve dhe gjithë bashkëpunëtorëve!”