Isa Mustafa informon Ambasadorin Kosnett për bisedimet LDK-VV

Ambasadori amerikan, Philip Kosnett sot në takim me Kryetarin e Lidhjes Demokratike të Kosovës, Isa Mustafa, ka biseduar rreth negociatave për krijim të koalicionit me Lëvizjen Vetëvendosje.

LDK përmes një komunikate thekon se Isa Mustafa ka informuar Ambasadorin Kosnett lidhur me rrjedhën e diskutimeve me Lëvizjen Vetëvendosje sa i përket çështjeve programore.

Në veçanti, u diskutua lidhur me harmonizimin e arritur deri tani në fushën e sundimit të ligjit, ekonomisë, çështjeve sociale, arsimit e shëndetësisë.

Isa Mustafa shprehi interesimin e LDK-së që Kosova sa më shpejt të ketë institucione funksionale që dalin nga kërkesat e qytetarëve për ndryshim, të shprehura qartë në zgjedhjet e 6 tetorit.

Ai falënderoi Ambasadën e Shteteve të Bashkuara për përkrahjen e vazhdueshme në të gjitha proceset në të cilat ka kaluar Kosova.