Tërmeti tragjik/ “Mes viktimave gjyshja që shpëtoi nipin me trupin e saj”, mediat e huaja raportojnë…
Tërmeti i fuqishëm i orës 03:54 me magnitudë 6.4 të shkallës Rihter dhe qindëra pasgoditje tjera që janë dëgjuar në gjithë rajonin, janë raportuar nga mediat fqinje dhe ato botërore minutë pas minute, si për numrin e viktimave sa shkon dhe rritet, aksionet e kërkim-shpëtimit dhe dëmet që ka shkaktuar ky tërmet tragjik.
Radio Televizioni i Kosovës duke raportuar për tërmetin me magnitudë 6.4 që është ndjerë në nëntë shtete, Shqipëri, Itali, Greqi, Kosovë, Maqedoni e Veriut, Mal i Zi, Bullgari, Serbi dhe Kroaci, thekson se drejt zonave të prekura nga tërmeti mënjëherë janë nisur njësitë e kërkim-shpëtimit të Gardës Kombëtare të Kosovës, FSK, bashkē me njësitë e specializuara K-9.
Ndërkohë Drejtori i Institutit Sizmologjik të Kosovës, Shemsi Mustafa, ka publikuar një raport të Rrjetit Sizmologjik të Kosovës ku thuhet se Shqipëria është goditur nga disa tërmete me magnitude 3.1-6.3 sipas shkallës Rihter. “Tërmeti në fjalë ishte i fuqishëm dhe është ndier dukshëm nga qytetarët e Kosovës dhe tërë rajonit,” thekson raporti.
Tërmeti i fuqishëm i mëngjesit të sotëm është ndjerë edhe në Maqedoninë e Veriut, ku mediat raportojnë minutë pas minute për çdo detaj mbi situatën në Durrës, Thumanë, Tiranë dhe jo vetëm. AlSat-M duke raportuar se një tërmet i fuqishëm 6.3 ballë ka goditur Shqipërinë ndërsa zyrtarisht 10 persona kanë humbur jetën. Një tjetër person i pajetë është nxjerrë nga rrënojat e pallatit të shembur në Thumanë, po ashtu i pajetë është nxjerrë edhe nga rrënojat në Durrës, duke e çuar në 10 persona të vdekur bilancin e tërmetit tragjik që goditi Shqipërinë mëngjesin e së martës. Ndonëse ende nuk ka një bilanc të saktë, Alsat-M raporton se nën rrënoja ka ende njerëz. Epiqendra e tërmetit ishte në afërsi të qytetit të Durrësit dhe 32 kilometra nga Tirana, ndërkohë që dëmet më të mëdha janë shkaktuar në qytetin bregdetar.
“Tërmeti shkatërrues ka goditur Shqipërinë, ka dhe të vdekur!” Ky është lajmi qendror i Televizioni publik të Malit të Zi, RTCG, dhe jo vetëm i cili duke raportuar për tërmetin e fuqishëm që goditi Shqipërinë thekson se ai është ndjerë edhe në Podgoricë, Beograd, Nish, Shkup dhe Kosovë. Presidenti Milo Gjukanoviç, raporton RTCG, i ka ofruar Shqipërisë ndihmë për pasojat e shkaktuara nga një seri tërmetesh që kanë goditur këtë vend.
Edhe Kroacia ku tërmeti i mëngjesit që goditi Shqipërinë ka shkaktuar panik nga veriu në jug të shtetit kroat, raporton për tërmetin e fuqishëm në mes të Durrësit dhe Tiranës me magnitudë 6.4 dhe pasgoditjet tjera. Televizioni publik i Kroacisë, HRT, flet për një bilanc paraprak me 7 të vdekur dhe 300 të plagosur ndërsa citon Ambasadorin e Turqisë në Shqipëri i cili është shprehur se 20 shtetasit turq janë shpëtuar nga një hotel i dëmtuar në Durrës. HRT dhe jo vetëm, duke i kushtuar vëmendje të veçantë kësaj ngjarje tragjike, raporton minutë pas minute mbi të rejat më të fundit nga Shqipëria ndërkohë raporton edhe për nëj tërmet të fuqishëm që ka goditur Bosnje Hercegovinën me maknitudë 5.4 të shkallës Rihter.
“Theguardian” shkruan se nga tërmeti kanë humbur jetën të paktën 6 persona dhe 300 të tjerë janë plagosur. “Një nga viktimat në Durrës ishte një grua e moshuar që arriti të shpëtonte nipin duke e mbrojtur me trupin e saj”, shkruan “Theguardian”.
BBC raporton se tërmeti i fortë shkatërroi ndërtesat duke zënë poshtë shumë persona, ndërsa shton se lëkundjet e forta u ndjenë edhe në Itali, Serbi e Kosovë.
Për tërmetin tragjik që goditi Shqipërinë kanë raportuar edhe mediat gjermane ndërsa “DW” raporton se ky është tërmeti më i fuqishëm që ka goditur vendin në dekada dhe se shumë persona kanë humbur jetën pasi i kanë zënë poshtë ndërtesat e rrëzuara.
