Tërmeti tragjik/ Ndihmë popullit shqiptar, Papa Francesco dhuron 100 mijë euro

Papa Francesco ka vendosur të dërgojë një kontribut fillestar në këtë fazë emergjente prej 100 mijë eurosh në ndihmë të popullit shqiptarë, të goditur nga tërmeti i 26 nëntorit.

Lajmin e kanë bërë të ditur mediat italiane duke raportuar se në Shqipëri tërmeti ka shkaktuar dëme të mëdha dhe një numër të madh viktimash.

“Në këtë mënyrë Ati i Shenjtë dëshiron të shprehë afërsinë e tij shpirtërore dhe mbështetjen e tij atërore ndaj njerëzve dhe vendeve të prekura,” thekson komunikata.

Ndryshe, dje Papa Francesco nga Sheshi Shën Pjetrit duke shprehur solidarizim me popullin shqiptar, pas tërmetit tragjik me magnitudë 6.4 të shkallës që goditi Shqipërinë, u shpreh se është afër viktimave, lutet për të vdekurit, për të plagosurit dhe për familjet.

“Dëshiroj t’i dërgoj përshëndetjen dhe afërsinë time popullit shqiptar që ka vuajtur aq shumë këto ditë. Shqipëria ka qenë vendi i parë i Evropës që kam dashur të vizitoj. Jam afër viktimave, lutem për të vdekurit, për të plagosurit dhe për familjet,” thekson Papa Francesco duke përfunduar.

Zoti bekoftë këtë popull që e dua aq shumë!