Lëvizja Vetëvendosje dhe LDK të hënën firmosin Marrëveshjen

Kryetari i Lëvizjes Vetëvendosje, Albin Kurti dhe ai i Lidhjes Demokratike të Kosovës, Isa Mustafa, pas takimit të sotëm ku kanë përmbyllur harmonizimin e programit qeverisës, duke u pajtuar për të gjitha çështjet e hapura mësohet se Marrëveshjen finale do ta firmosin të hënën.

Albin Kurti dhe Isa Mustafa nuk janë prononcuar për media, por Lëvizja Vetëvendosje përmes një komunikate thekson se nga dy modalitetet e ndryshme për kabinetin qeverisës me 12 ministri, që i kishin ofruar ekipet e punës të dy subjekteve politike, Kurti dhe Mustafa u përcaktuan për versionin e parë.

“Në vijim do të përzgjedhen përgjegjësitë në qeverisjen e përbashkët, për çfarë u sqaruan pozicionet dhe kërkesat. Pra, u hap tema dhe u saktësua principi i zgjidhjes, e që përfundimisht do të përmbyllet të hënën me marrëveshje,” thuhet në njoftim.