Ky vend na paska Prokurori/ Tërmeti tragjik në Durrës, regjistrohet çështja penale

Në ditën e shtatë pas tërmetit tragjik të 26 Nëntorit ku mbetën të vdekur 51 persona, qindra të lënduar dhe ndërtesa të shkatërruara, Prokuroria e Durrësit ka regjistruar çështjen penale për hetim.

“Më datë 29.11.2019 Prokuroria Durrës ka regjistruar çështjen penale që i referohet tërmetit të datës 26.11.2019 ku si pasojë e tij janë shembur një numër ndërtesash që kanë shkaktuar vdekjen e një numri personash,” thuhet në njoftimin e organit të akuzës pas dyshimeve se kjo është shkaktuar për shkak të ndërtimeve pa leje, moskryerjes së zbatimit dhe mbikëqyrjen e ndërtimeve.

“Për këtë dyshohet se pasojat kanë ardhur si shkak i ndërtimeve pa leje dhe të moskryerjes së detyrës nga inxhinierët zbatues dhe personave përgjegjës si dhe nga mospërmbushja e rregullt e detyrës nga nëpunësit shtetëror të ngarkuar me mbikëqyrjen e këtyre ndërtimeve”. Ndërkohë saktësohet se “Çështja është regjistruar për veprat penale; “Ndërtim pa leje”, dhe “Shpërdorim detyre”, parashikuar nga nenet 199/a, 3 dhe 248 kodit penal”.