Unaza e Re/ Strehohen 100 banorë të prekur nga tërmeti, Basha: Ka nevojë për ushqime, pajisje, tavolina e karrige…

Kryetari i Partisë Demokratike, Lulzim Basha, sot duke vizituar 100 familjet e strehuara tek një godinë në Unazën e Re tha se kemi të bëjmë pikërisht me një godinë e cila ishte planifikuar të prishej nga projekti kundër të cilit protestuan banorët e Unazës së Re dhe sot është streha e rreth 100 banorëve të prekur nga tërmeti, mes të cilëve 30 fëmijë.

“Kushtet mund të mos jenë optimale, por janë ofruar me zemër nga këta njerëz që kanë përjetuar një lloj tjetër tërmeti, tërmetin shtetëror,” tha Basha duke iu referuar përplasjes së banorëve të Astirit kundër projektit që u shembte shtëpitë ndërsa falënderoi bamirësit dhe vullnetarët për ndihmën e tyre në ditë të vështirë.

“Po tregoni se keni një zemër të madhe, sepse e njihni vuajtjen për shtëpinë!”

Disa prej banorëve, të zhvendosur nga Kombinati, Vora, Nikla, Ishmi dhe Bubqi rrëfyen se nuk janë lënë të braktisur vetëm pas këtij tërmeti, por e njejta gjë ka ndodhur edhe pas tërmetit të 21 Shtatorit.

“Kemi bërë kerkesë që kur është dëmtuar në shtator, askush s’na ka parë. Kemi jetuar prapë në atë banesë se nuk na kanë dhënë zgjidhje,“ tha një banor i Zall Bastarit dhe u konfirmua edhe nga banorë tjerë nga zona të ndryshme.

Gjatë takimit me familjet e strehuara tek Astiri u diskutua edhe për një shqetësim serioz, ftohja e fëmijëve nga lënia për 2-3 ditë në çadra të papërshtatshme ndërsa Kryetari i Partisë Demokratike, Lulzim Basha u shpreh:

“Ilaçet janë siguruar deri tani nga vullnetarët, por kujdesi mjekësor i specializuar duhet të mos mungojë.”

Ndryshe, tek godina që mirëpret 100 banorët e prekur nga tërmeti, janë krijuar kushte provizore që fëmijët të argëtohen dhe të kalojnë kohën me lexime librash deri në nisjen e shkollës.

Deklaratë

Dua të falënderoj nga zemra Flamurin dhe familjen e tij që ka vënë në dispozicion prej ditës së parë këtë ndërtesë. Dua të falenderoj Aleancën për Teatrin që ka kontribuar prej orëve të para me ndihmat që janë mbledhur për të goditurit nga tërmeti. Dua të falenderoj të gjithë banorët e “Unazës së Re” që po punojnë si vullnetarë, duke ndihmuar nga mëngjesi deri në darkë dhjetëra familje të strehuara kryesisht nga zonat e goditura nga tërmeti.

Falënderoj mjekët që, në mënyrë vullnetare, po kontribuojnë për shëndetin e shume prej tyre që janë të sëmurë kryesisht për shkak të qëndrimit në çadra në ditët e ftohta dhe në orët e para të fatkeqësisë dhe po kështu dua të falënderoj nga zemra këdo që ka mbështetur me kontribute, me ushqim, me orendi.

Dua të theksoj se ky është një kontribut i gjithi vullnetar. Falënderoj të rinjtë e FRPD-së dhe strukturat tona të degës 6 dhe 7, të cilët po bëjnë gjithçka për t’i ndihmuar. Falënderimi kryesor i takon këtyre njerëzve me zemër të madhe. Këtu po qëndrojnë afër rrënojave të një tërmeti tjetër, të një tërmeti të shkaktuar nga babëzia dhe korrupsioni dhe është domethënëse.

Nuk është e rastësishme që këta njerëz që e kanë vuajtur jo një ditë, siç e vuajtën familjet e goditura apo gjithë shqiptarët, por ditë për ditë traumën e fatkeqësisë, këta janë të parët që hapën zemrat, hapën shtëpitë e tyre, dhanë gjithçka po ndihmojnë të parët, për t’u qenë pranë njerëzve që sot kanë më shumë nevojë se kurrë për ndihmë. Kam një mesazh për këdo që ka mundësi të ndihmojë.

Këtu ka nevojë për ushqime, pajisje, tavolina, karrige, ka shumë fëmijë që po trajtohen vullnetarisht nga psikologë dhe studente të psikologjisë, të cilat i falënderoj. Shumëkush ka ardhur, kanë kontribuar financiarisht, por ka ende shumë nevojë për ndihmë materiale.

Ka akoma mundësi për të strehuar edhe disa familje të tjera, por ndërkohë mundësitë për të kontribuar me ushqime dhe orendi janë të pakta.

Ne do të bëjmë ç’është e mundur si opozitë për të furnizuar këtë qendër dhe qendra të tjera përmes kontributeve vullnetare, tona dhe të mbështetësve tanë. I bëj thirrje kujtdo që mund të kontribuojë, të kontribuojë në këtë qendër që ndodhet këtu në zonën e “Unazës së Re”.

Dua të falënderoj ata që kanë hapur dyert dhe zemrat dhe kanë treguar se shqiptarët në raste të tilla fatkeqësie dinë të jenë një familje e madhe me një zemër shumë të madhe. Dhe ky është një shembull prekës dhe emocionues i kësaj zemre të madhe të shqiptarëve në vështirësi, për njëri tjetrin