Pasojat nga tërmeti, dëmtohet godina e Drejtorisë së Përgjithshme të Doganave

Tërmeti që goditi Shqipërinë më 26 nëntor nuk ka kursyer as institucionet shtetërore. Dëmtime të shumta strukturore janë konstatuar në godinën e Drejtorisë së Përgjithshme të Doganave. Sipas akt-konstatimit të inspektorëve të Institutit të Ndërtimit, kjo godinë është jashtë funksionit.

Nga drejtuesit e këtij institucioni aktualisht janë marrë të gjitha masat për shpërnguljen e punonjësve në godina të tjera, çka garanton mirëfunksionimin e punës dhe ofrimin e shërbimeve ndaj qytetarëve dhe biznesit. Nga DPD është miratuar “Manuali mbi mënyrën e funksionimit të sistemit doganor lidhur me deklarimin, verifikimin, kontrollin dhe çlirimin e mallrave në raste emergjence”.

Është kryer transferimi i serverëve pranë zyrave të AKSHI-t, si dhe është kryer zhvendosja e sektorëve kyç (VQ dhe SKAO) pranë zyrave të disponueshme në gjendje pune. Të gjitha degët doganore kufitare dhe të brendshme, në çdo moment kanë funksionuar me kapacitete të plota./Monitor/