Detaje/Dhjetëra plagë në trup, 52-vjeçarja që u masakrua nga i shoqi u përpoq të vetëmbrohej…

Një vdekje të tmerrshme ka pasur 52-vjeçarja Elca Tereziu, e cila u vra nga bashkëshorti i saj në sy të djalit të mitur në Piacenza të Italisë. Të paktën kështu tregojnë rezultatet e para të autopsisë së kryer në trupin e shqiptares.

Mediat italiane raportojnë sot se nëna e dy fëmijëve ka pësuar dhjetëra goditje me thikë në trup e qafë. Pavarësisht tentativave të saj për t’u mbrojtur, ajo kishte prerje në duar dhe parakrahë.

Më 30 maj, mjeku ligjor i Universitetit të Pavias, Chen Yao kreu autopsinë, ku u konstatua se në trupin e 52-vjeçares, në duar dhe krahë kishte plagë të bëra nga një mjet prerës. Kjo tregon se Elca Tereziu është përpjekur në çdo mënyrë për t’u mbrojtur nga i shoqi, ku dyshohet se gjatë përleshjes ta ketë vënë gruan për poshtë, pasi ajo kishte mbuluar fytyrën me duar.

52-vjeçarja, sipas ekspertit mjeko-ligjor ka vdekur pas disa minutash agonie, për shkak të gjakderdhjes.

57-vjeçari Xhevdet Mehmeti, autori i kësaj ngjarjeje të rëndë, ditën e djeshme iu përgjigj pyetjeve të gjykatëses Stefania Di Rienzo, ndërsa tregoi ngjarjen tragjike të së dielës së kaluar.

Avokati i tij u shpreh se 57-vjeçari ka kuptuar veprimin e rëndë dhe ka një ndjenjë të fortë turpi dhe faji ndaj dy djemve të tij. Avokati u shpreh se Mehmeti pavarësisht se ka ripërsëritur se gruaja kishte një karakter agresiv, sërish nuk duhet ta kishte vrarë dhe se ajo nuk meritonte atë që i bëri.

Mehmeti ka treguar për një martesë të vështirë, me sherre të vazhdueshme për shkak të xhelozisë së gruas, por sipas avokatit, ai nuk është përpjekur në asnjë mënyrë që të justifikohet për atë që ka bërë dhe është i penduar.

Ndërkohë akuzës së vrasjes me dashje, autoritetet italiane i kanë shtuar edhe atë të keqtrajtimit në familjes.