Përplasje e ashpër mes Molliqaj dhe Konjufcës për shkarkimin e Dërgutit

Kërkesa e Vetëvendosjes për shkarkimin e Aida Dërgutit nga pozita e nënkryetares së Parlamentit të Kosovës, ka bërë që të përplasen ashpër deputeti i PSD-së, Dardan Molliqaj me shefin e Grupit Parlamentar të Vetëvendosje, Glauk Konjufca.

Gjatë fjalës së tij Glauk Konjufca nuk ka nguruar që ta krahasojë me presidentin Hashim Thaçi, ish-partiakun e tij Dardan Molliqaj.

“Moti se nuk e pasna dëgjuar Hashim Thaçin tu fol në Kuvend. Pasna harru se që dy vite nuk u kanë. Qysh po tingllojka si Thaçi, me atë stilin se për ty kam diçka, po mos m’shti me fol, mos me shti me të thanë e me i shkua deri në fund se nuk e din çka të gjënë. Moti nuk e pasna dëgju, një diskurs të tillë qesharak. Kjo foltore nuk është adekuate me i shpalosë traumat që i kanë pas prej debateve”, ka thënë Konjufca.

I menjëhershëm ka qenë edhe reagimi i Dardan Molliqajt, i cili i ka porositur ish bashkëpartiakët e tij që nëse vazhdojnë kësisoj, ai do t’ua nxjerrë “letrat” të Vetëvendosje e di cilat janë.

“Po ta pranoj. Kam traumë, e kam prej teje, prej një njeriu që e kam respektuar shumë. Glauk njëri i mirë por, pa dinjitet. Unë po tingëllojë si Kadria, Ramushi, Isa, po unë nuk i shërbejë askujt. Nuk po të them ty sahanlëpirës, por, ti je bërë shërbyes Glauk”, u shpreh Molliqaj.