Albin Kurti: Në seancë konstituive shkojmë pa marrëveshje me LDK-në!
Një ditë para seancës konstituive të Parlamentit të ri të Kosovës, Kryetari i Lëvizjes Vetëvendosje, Albin Kurti, ka konfirmuar se me Lidhjen Demokratike të Kosovës nuk kanë arritur marrëveshje për koalicion qeverisës.
Përmes një video mesazhi në rrjetin social Facebook, Albin Kurti ka sqaruar pse LDK ka refuzuar ofertën e Lëvizjes Vetëvendosje por negociatat për qeverinë e re nuk i ka shpallur të përfunduara ndërsa ka bërë të ditur arsyet pse në seancën konstituive të Parlamentit të ri të Kosovës, Lëvizja Vetëvendosje dhe LDK shkojnë pa marrëveshje.
“Është obligimi im moral dhe politik, shtetëror dhe kombëtar, qytetar dhe njerëzor, që t’ju njoftoj se në seancën inauguruese të legjislaturës së shtatë, do të shkojmë pa pajtimin për qeverinë. Marrëveshjes për programin qeverisës, nuk kemi mundur t’ia bashkëngjitim edhe atë për ndarjen e përgjegjësive. Oferta ime e parmbrëmshme, pra, e datës së 23 dhjetor 2019, u refuzua dje,” tha Albin Kurti duke sqaruar edhe situatën nëse insistohet që LDK ta ketë edhe postin e Presidentit.
“Çështjen e presidentit më së miri e lëmë për më vonë. Mirëpo, nëse LDK-ja insiston që ne patjetër ta bëjmë premtimin për nominimin nga LDK, atëherë neve duhet të na shtohet tash një ministri: Ministria e Punëve të Brendshme, e cila ka rëndësi jetike për luftimin e krimit dhe korrupsionit. Nominimi i LDK-së për kandidatin për president, bëhet pasi të mos kemi gjetur një personalitet koncensual jashtëpartiak, kurse kur të përcaktohet LDK-ja për emrin e tij/saj, do të kërkohet edhe pëlqimi i Vetëvendosjes.”
Ndryshe, Presidenti i Republikës ka caktuar datën 26 Dhjetor, si ditën e zhvillimit të seancës konstituive të legjislaturës së shtatë të Parlamentit të Kosovës. Me konstituimin e tij pason afati 15-ditor për formimin e qeverisë.
Në rast se Parlamenti nuk konstituohet, atëherë Lëvizja Vetëvendosje dhe LDK do të kenë një afat të pacaktuar që të arrijnë marrëveshje. Në rast se dështojnë në arritjen e një marrëveshje atëherë Kosova mund të shkojë sërish në zgjedhje të reja të jashtëzakonshme parlamentare.
