Sot mbledhja konstituive e Parlamentit të Kosovës

Sot mbahet seanca konstituive e legjislaturës së shtatë e Parlamentit të Kosovës.

Pas vendimit të Presidentit, kryesia e Parlamentit konfirmoi se seanca konstituive do të mbahet sot duke filluar në orën 15:00.

Në përbërjen e re parlamentare do të jenë të përfaqësuara 14 subjekte politike.

Seanca do të kryesohet nga deputeti më i vjetër në moshë, përkatësisht Jahja Koka, shoqëruar nga deputeti më i ri, deputetja Fjolla Ujkani, që të dy deputetë nga Lëvizja Vetëvendosje.

Pikë e parë e seancës do të jetë formimi i Komisionit të përkohshëm për verifikimin e kuorumit dhe mandateve, për t’u pasuar me betimin e deputetëve.

Seanca konstituive do të përmbyllet me zgjedhjen e Kryetarit dhe të Nënkryetarëve të Parlamentit. Bazuar në vendimin e Gjykatës Kushtetuese këto poste i takojnë partisë fituese, por meqë për momentin nuk ka një marrëveshje koalicioni në mes Lëvizjes Vetëvendosje dhe LDK zgjedhja e këtyre posteve nuk do të bëhet sot; Por kjo mund të bëhet edhe në ditët në vijim.

Po ashtu janë përcaktuar edhe ulëset për grupet parlamentare.

Duke u bazuar në Rregulloren e Parlamentit, grupi më i madh parlamentar që është Vetëvendosje do të ulet në qendër, grupi i dytë me radhë e që është LDK në anën e djathtë të kryesuesit të seancës, ndërsa grupi i tretë që është PDK në anën e majtë të kryesuesit.

Përcaktimi i ulëseve për grupet e tjera do të bëhet në vijim.