Kolegji i Kryetarëve i PD, Basha: Gati për zgjedhje të parakohshme!

Situata pas tërmetit, reforma zgjedhore dhe në fund zgjedhjet e parakohshme ishin temat e diskutimeve në Kolegjin e Kryetarëve kryesuar nga Kryetari i Partisë Demokratike, Lulzim Basha, ku dhe e bëri të qartë se grupet e ekspertëve janë në fund të hartimit të draftit për reformën zgjedhore.

Projektligji, tha Lulzim Basha, do të jetë gati në fillim të janarit.

“Do të bëhet prezantim publik dhe njëherë do t’i bëhen të ditura të gjitha strukturave të PD dhe qytetarëve. Pas prezantimit, këto propozime do t’i nënshtrohen një konsultimi të gjerë për të marrë mendimin e anëtarësisë dhe qytetareve edhe për sa i përket aspekteve të tjera të reformës siç është sistemi zgjedhor.”

Kryetari i Partisë Demokratike kërkoi me këtë rast nga krerët e degëve që të jenë gati me të gjitha strukturat, që të monitorojnë zhvillimet politike në janar në mënyrë që më pas të përcaktohet edhe agjenda.

“Ne duhet të dëgjojmë zërin e qytetarëve, duhet të bëjmë konsultim të gjerë me ta dhe më të gjitha grupet shoqërore në çdo cep të vendit. Për të vendosur reagimin nëse kjo qeveri nuk do të pranojë draftin tonë për reformën zgjedhore, do të vazhdojë të vjedh dhe të abuzojë bashkë me krimin në Shqipëri.”