Rroga 7.000 $ në muaj, kërkohen 51 mijë punëtorë për këtë profesion…

Vitin e kaluar në Shtetet e Bashkuara kërkoheshin 51 mijë shoferë kamioni në mënyrë që të plotësohen kërkesat e të gjitha kompanive të cilat artikujt e tyre i prodhojnë dhe duhet ti transportojnë nëpër Amerikë, shkruan Washington Post.

Mungesa e shoferëve të kamionëve, e cila këtë vit mund të rritet, ka filluar të shprehet edhe me rritjen e çmimeve, e për ti joshur më shumë punëtorët, kompanitë e transportit i kanë rritur dukshëm rrogat për shoferë.

Për shembull, në Brenny Transportation nga Minnesota, rrogat për shoferë janë rritur për 15 për qind, e sipas drejtores Joyce Brenny shumica e shoferëve të tyre tani ka rrogën 80 mijë dollarë në vit (rreth 9.000.000 lekë).

Në fakt, rritja ekonomike ka ndikuar edhe në kërkesën gjithnjë e më të madhe për shoferë kamioni, por për shkak të papunësisë historike më të ulët është e vështirë të gjenden punëtorë. Pastaj të rinjtë në Amerikë, nga frika se industrinë e transportit së shpejti do ta marrin makinat e pavarura, shpesh as që lajmërohen në konkurse për këtë lloj profesioni. Megjithatë, automatizimi i përgjithshëm i industrisë së transportit nuk do të realizohet shumë shpejtë, e shoferët e kamionëve edhe për një kohë të konsiderueshme do të jenë një profesion që kërkohet shumë.

Për çfarë pune është fjala, dhe çfarë është ajo që ndikon për interesimin aq të vogël për këtë profesion. The Washington Post ka hulumtuar në mesin e disa shoferëve të kamionëve, tek ata që kanë vendosur para disa muajve që të merren me këtë profesion duke bërë një kthesë të dukshme në karrierën e tyre, dhe tek ata që me këtë biznes merren me dekada të tëra e madje edhe gjatë gjithë jetës së tyre.

Shumica prej tyre vetminë dhe ndarjen e gjatë nga familja e kanë theksuar si

pjesën më të vështirë të këtij profesioni.

“Fëmijët e mi tani kanë mbushur të njëzetat. Në pjesën më të madhe të fëmijërisë së tyre nuk kam qenë prezent, ashtu si edhe gjatë moshës së pjekurisë. Më thonë se kanë dëshirë të jem shpesh në shtëpi. Meqë jam shofer kamioni, dy herë jam divorcuar. Për perspektivën e duhur të shoferëve, më së miri është të bisedoni me bashkëshortet e tyre, tha Michael Dow i cili me këtë profesion merret më shumë se 20 vjet.

Shoferi tjetër, Lee Klass, i cili i jep kamionit më shumë se 40 vjet, tha se në këtë profesion “duhet të përshëndeteni nga jeta shoqërore”.

Mënyra e vetmuar e jetesës, orë të tëra të kaluara në rrugë, me higjienën e trupit të realizuar në kushte jashtëzakonisht të vështira nëpër parkingjet buz rrugës, si dhe të ushqyerit me cilësi shumë të dobët, janë disa kushtet me të cilat gjithmonë duhet të jeni të përgatitur nëse jeni përcaktuar për karrierën e shoferit të kamionit.

Mirëpo, shumë prej shoferëve të intervistuar theksuan se këtë profesion do t’ja sugjerojnë të tjerëve, nëse janë të gatshëm për stil jetese i cili shoqëron këtë punë.

“Do ta rekomandoja këtë punë. Miqve që punojnë nëpër fabrika me rroga minimale, u them të licencohen për shoferë kamioni, që është një proces i cili zgjatë vetëm disa javë. Kjo është  mënyra më e lehtë për të fituar para pa një diplomë universitare, por bëhet fjalë për një industri kërkuese. Shumicën e kohës do të jeni vetë,” tha shoferi i kamionit, Daniel Gollnick.

“Me cilën lloj pune, pa një edukim minimal, mund të fitoni menjëherë që nga fillimi, 50 mijë dollar në vit? thekson Ryan Kitchel i cili me këtë punë merret që dy vjet.