Isa Mustafa: Ndoshta Vetëvendosje ka menduar të na japë Kryeministrin!

Kryetari i Lidhjes Demokratike të Kosovës, Isa Mustafa, tha se Lëvizja Vetëvendosje me siguri e ka menduar që LDK t’i japin postin e kryeministrit, pasi ata e morën atë të kryeparlamentarit.

“Gjithçka është e mundur në këtë vend,” tha ai në një intervistë për KTV ndërsa e pranoi se partia e tij janë zënë në befasi me emërimin e Glauk Konjufcës për kryetar të Parlamentit të Kosovës.

“Ishte befasi totale. Nuk e gjej asnjë deputet të Grupit Parlamentar të LDK-së që e ka ditur se Konjufca do të bëhet kryetar i Kuvendit. Unë nuk e kam dit dhe asnjë deputet nuk e ka ditur.”

Duke folur për marrëveshjen e re, Isa Mustafa tha se tashmë është një konfiguracion i ri, gjithsesi duhet të bëhet marrëveshje e re lidhur me përgjegjësitë, por shton se ndoshta ka nevojë edhe për program të ri të qeverisë ndërkohë ka lënë të hapur edhe mundësinë e kalimit të LDK-së në opozitë.

“Çdo gjë është e hapur, edhe mundësia që të dalim në opozitë, ta bëjmë një opozitarizëm shumë të mirë, të suksesshme,” tha Kryetari i LDK dhe derisa nuk mbyllet procesi asgjë nuk është absolute edhe pse e pranoi se zgjedhjet e reja nuk janë zgjidhje.

“Nuk është orientimi i mirë për të shkuar në zgjedhje sepse nuk kemi bërë zgjedhje për të shkuar në zgjedhe. Energjinë tonë nuk duhet ta shfrytëzojmë për të thënë se duhet shkuar në zgjedhje por duke kërkuar zgjidhje,” tha Kryetari i LDK, Isa Mustafa dhe nëse ndodhë kjo:

“Shkojmë në zgjedhje, pa problem. Nëse shkojmë ne zgjedhje, ne do të kemi parasysh edhe faktorët që na çojnë në zgjedhje.”