Gjykata mbyll çështjen e “Lobimit”/ Prokurorëve dhe Gjyqtarëve, Taulanti: Nuk keni kaluar vetingun…

Kur Prokuroria mbylli çështjen e “lobimit rus” dhe çoi në Gjykatë vetëm “falsifikimin e formularëve”, Sekretari i Përgjithshëm i Partisë Socialiste, Taulant Balla, “urdhëroi” Prokurorinë duke pretenduar se “lobimi rus” ka ndodhur se s’bënë dhe sot kur Gjykata e Tiranës mbylli çështjen edhe për akuzën e falsifikimit të formularëve ai sërish kërcënon duke e quajtur nxitim tē stimuluar të ndonjë prokurori dhe gjyqtari që nuk e ka kaluar procesin e vettingut dhe që zbaton parimin “kap çfar të kapësh”.

“Kush mendon se kjo dosje e rëndë me të pandehur kryesor Lulzim Bashën, mund të mbyllet kështu pa u hetuar aspak në themel, pa u marrë në pyetje të gjithë personat e përfshirë, e ka shumë gabim. Kjo nuk është një çështje vetëm e drejtësisë shqiptare,” tha Taulant Balla në reagimin e tij përmes rrjetit social Facebook duke e cilësuar seancën e sotme ku u pushua çështja e “lobimit” si teatër të turpshëm për sytë e shqiptarëve dhe jo vetëm.

Dhe jo vetmë kaq! Pasi “urdhëroi” Prokurorët dhe sot i kujtoi prokurorëve dhe gjyqtarëve se nuk e kanë kaluar vettingun, ai tashmë lëshoi një “urdhêr” të ri për KLP dhe KLGJ:

“Këshilli i Lartë i Gjyqësorit dhe Këshilli i Lartë i Prokurorisë duhet të hetojnë gabimet procedurale me dashje, që çuan në këtë teatër të turpshëm, ku prokuroria hetoi 2 vite dhe gjykata e mbylli për 2 orë.”

Ja postimi i plotë:

Kush mendon se kjo dosje e rëndë me të pandehur kryesor Lulzim Bashën, mund të mbyllet kështu pa u hetuar aspak në themel, pa u marrë në pyetje të gjithë personat e përfshirë, e ka shumë gabim.

Kjo nuk është një çështje vetëm e drejtësisë shqiptare.

Nxitimi i stimuluar i ndonjë prokurori dhe gjyqtari që nuk e ka kaluar procesin e vettingut dhe që zbaton parimin “kap çfar të kapësh”, shfaqën sot këtë teatër të turpshëm për sytë e shqiptarëve dhe jo vetëm.

Këshilli i Lartë i Gjyqësorit dhe Këshilli i Lartë i Prokurorisë duhet të hetojnë gabimet procedurale me dashje, që çuan në këtë teatër të turpshëm, ku prokuroria hetoi 2 vite dhe gjykata e mbylli për 2 orë.

Apelimi i këtij vendimi absurd dhe rikthimi i çështjes për hetim të plotë duke dhënë edhe garancitë nga Gjykata për marrjen në pyetje të përfituesit të parave Nik Muzin, janë hapat e vetëm për të hedhur dritë e për të bërë drejtësi në këtë dosje të rëndë.