Tryeza për Reformën Zgjedhore/ Mandatohen Bylykbashi dhe Vasili, Basha:Ja 3 kushtet për mazhorancën…

Pas takimit me Aleatët, Kryetari i Partisë Demokratike, Lulzim Basha, bëri të ditur se Opozita e Bashkuar ka mandatuar Oerd Bylykbashin dhe Petrit Vasilin si dakordësues me mazhorancën për miratimin e Reformës Zgjedhore ndërsa përmendi dhe tre kushtet për miratimin e Reformës në mënyrë gjithpërfshirëse.

“Prej muajit tetor opozita e bashkuar ka insistuar në një mekanizëm transparent për të përfunduar Reformën Zgjedhore që i paraprin procesit të zgjedhjeve të lira e të ndershme. Prej shtatorit është kusht i patejkalueshëm i Bundestagut.

Kanë kaluar 4 muaj dhe ky proces është zvarritur, në mungesë vullneti nga pala tjetër. Sot opozita e bashkuar rikonfirmon qëndrimin për nisjen pa vonesë dhe përfundimin një orë e më parë të reformës zgjedhore dhe mandaton Oerd Bylykbashi dhe Petrit Vasili për të dakordësuar miratimin e Reformës Zgjedhore, duke i qëndruar plotësisht  pikave të parashtruara në tetor,” tha Lulzim Basha ndërsa përsëriti 3 kërkesat e përfaqësuesve të Opozitës së Bashkimit në takimin e orës 13:00 për Reformën Zgjedhore:

1.Miratim i reformës zgjedhore në mënyrë transparente, gjithëpërfshirëse, konsensuale mes partive politike;

2.Hartimi dhe diskutimi i reformës jashtë parlamentit në tryezën politike të partive;

3.Miratimi pa ndryshime nga komisioni dhe Parlamenti i produktit konsensual të tryezës politike.