Shpresa vdes pas Amerikës!
nga Agim Popoci
Mëngjesin e së enjtes shqiptarët u gdhinë me dy lajme të këqija që raportonin dy institucione ndërkombëtare, mbi Indeksin e Demokracisë dhe Indeksin e Perceptimit të Korrupsionit. Jo se shqiptarët nuk ishin në dijeni të faktit se në këtë vend nuk ka demokraci dhe se nuk bënë dot asnjë veprim në shtet, madje tashmë as në privat, pa ryshfet; Por shqetësuese ishte renditja mizerabël e shqiptarëve që kishin në Ballkan, aty ku vetëm shtete nuk ka!
Por që dita të mos pagëzohet “ters”, gëzoj fakti se më në fund Presidenti i SHBA, Donald Trump shkeli në tokën shqiptare. Pas një pushtimi disavejçar të komunistëve në Ambasadën e Shteteve të Bashkuara në Tiranë, më në fund, në krye të Ambasadës vjen njeriu i Presidentit Trump, presidentit i cili është zotuar për zbërthimin e komunizmit, jo vetëm në botë por edhe ndër administratën amerikane që ka filluar të përhapet shumë më keq se virusi i supës me lakuriq nate.
Pra, dita e parë e Ambasadores së re të SHBA në Shqipëri, Yuri Kim, tashmë pa ekzagjerim ngelet shpresa e vetme që kanë shqiptarët, të cilët historia i ka mësuar se në tokën shqiptare shpresa nuk vdes e fundit. Pse?!
Demokracia dhe Korrupsioni
Procesi zgjedhor dhe pluralizmi, funksionimi i qeverisë, pjesëmarrja politike, kultura politike dhe liritë civile, nuk është se janë cilësi me të cilat mburren shqiptarët por fakti që Indeksi i Demokracisë dëshmon se “Demokracia në Shqipëri” ka pësuar rënie, madje është e fundit edhe në Ballkan, i bënë ata të turpërohen. Dhe jo vetëm kaq!
Shqiptarët, që partinë e kanë “edhe bukë edhe gjellë”, i penalizon pjesëmarrja politike për të shkel në vitin 2020 me një shtet pa demokraci ndërkohë realiteti është shumë me më pak shpresa se sa ky fakt.
Serbia kriminale ka një autokrat në krye të shtetit, Aleksandar Vuçiç, po aq sa Edi Rama, dhe shqiptarët çuditen pse ajo renditet shumë më lartë se Shqipëria. Madje edhe Bosnje Hercegovina, e cila nuk dihet se ku është Bosnje e ku Hercegovinë, dhe nëse do të gdhihet Serbi, Kroaci apo Turqi, dhe është shtet më demokratik se Shqipëria.
Por ende pa e marr veten nga ky fakt, Transparency International publikon raportin e fundit të luftës kundër korrupsionit ku konfirmohet se në Shqipëri lufta kundër korrupsionit ka pësuar rënie. Jo se kishte dikush iluzion se në Shqipëri demokracia mund të vij dhe korrupsioni mund të luftohet me portalet e Edi Ramës, por të gjithë të zemëruarit me Bashkimin Europian, ose më saktë siç u adresua me Francën dhe Holandën, me mosçeljen e negociatave e kuptuan qartë se nuk mashtron vetëm Edi Rama por ditën për diell na mashtroi edhe Komisioneri për Zgjerimin e BE, Johannes Hahn kur na tha se sa të mirë që jemi por janë ca shtete që kanë disa kushte të çuditshme.
Jo, jo, Komisioneri Hahn s’ka se çfarë thotë, as për Francën as për Holandën, as për Macronin dhe as për problemet brenda BE, sepse shqiptarët kanë filluar ta humbin shpresën në atdheun e tyre ku tashmë duhet të paguash edhe në spitalet private ryshfet për tu kuruar me urgjencë, ndryshe tjetri, thënë shqip, jep lekë për tu kontrolluar pa radhë!
Shpresa vdes e fundit!
Sikur të mungonin faktet historike, sikur të mos ekzistonte Amerikan, vërtetë do të vlente thënia, shpresa vdes e fundit!
Por kur u krijua shteti shqiptar, kur Mali i Zi dhe Serbia u futën me kuç e me maç në tokën shqiptare, kur kjo tokë filloi të fshihet nga faqja e dheut me bekimin e Fuqive të Mëdha, ngeli vetëm shpresa. Por shqiptarëve ju rezultoi se e fundit ishte Amerika, dhe Shqipëria vazhdoi të ekzistoj si shtet.
Kështu ndodhi edhe me luftërat botërore, rënien e komunizmit, vitin kriminal 1997 luftën e Kosovës, anëtarësimin në NATO, liberalizimin e vizave, Reformën në Drejtë dhe së fundi Reformën Zgjedhore.
Shumë për të qenë rastësi, kjo është dhe arsyeja pse shqiptarët janë të detyruar ti besojnë vetëm Amerikës e cila kurrë nuk iu tha të presin sa të rregullohemi Ne, se do t’ju ndihmojmë, siç bënë BE!
Sot shumë joshqiptarë thonë se sikur mos të ishte ndërhyrja e Presidenti Woodrow Wilson nuk do të kishin shpërthyer luftërat e vitit 1990. Por, shqiptarët e kishin dhe e kanë të qartë se Presidenti Wilson shpëtoi Shqipërinë dhe luftërat e vitit ’90 në Ballkan i nxiti vetëm Milosheviçi, dhe ishte vetëm Amerika ajo që i ndaloi pas dështimit të politikës së BE në Ballkan kur e gjithë Evropa Juglindore u përmbyt në gjak!
Historia komuniste serviri një të vërtetë ndryshe për Konferencën e Bujanit, por parimi i vetëvendosjes që shpëtoi Shqipërinë nga Presidenti Wilson me përfundimin e luftës së parë botërore, u bë nul nga vetë Enver Hoxha me përfundimin e luftës së dytë botërore për ta lënë Kosovën nën Serbi. Pra, ishte vota shqiptare në Kuvendin e Prizrenit me sugjerimin e Enver Hoxhës, që nuk i la vend ndërhyrjes nga jashtë dhe u vulos Jugosllavia me Kosovë!
Shqiptarët e kujtojnë jetën nën komunizëm edhe pas rënies së Murit të Berlinit dhe shkeljes triumfale të Sekretarit amerikan të Shtetit, James Becker, në tokën shqiptare. Nuk ishte ndërkombëtari i pari që shkeli në tokën shqiptare pas rënies së komunizmit por i vetmi që rikthej shpresën tek shqiptarët!
Shqiptarëve në Kosovë nuk iu tha njeri nga Washingtoni të presin se kishin një problem me “Skandalin Lewinski” e pastaj do merren me Milosheviçin. Jo, jo! Kriminelit të Ballkanit, Amerika i tha larg duart nga Kosova dhe kur nuk dëgjoi e goditi ndërsa ndëshkimi nuk iu ndalua Serbisë deri në vitin 2008 kur u shpall pavarësia e Kosovës.
Përpjekjet e shqiptarëve për zhvillimin e demokracisë dhe luftën kundër korrupsionit kanë lënë shumë pak gjurmë në memorien e shqiptarëve, por ata nuk harrojnë se si pas zgjedhjeve kriminale të vitit 2001 nga Partia Socialiste me Kryeministër Ilir Metën, ishte Amerika ajo e cila si zgjidhje kompromisi vendosi që Partia Demokratike ta propozoi Presidentin!
Sot, nuk ka shqiptarë që jeton me iluzionin se Shqipëria plotësonte kushtet dhe u bë anëtare e Aleancës më të fuqishme politiko-ushtarake në botë. Jo, ishte Amerika dhe vetëm Amerika, si në rastin e Kosovës, e cila u zotua dhe anëtarësoi Shqipërinë në NATO. Angazhim i cili ishte i padiskutueshëm edhe me liberalizimin e vizave, vetëm një vit pas anëtarësimit në NATO, pra 2010.
Pse shqiptarëve nuk iu çelën negociatat dhe pse nuk u liberalizuan vizat për Kosovën, patjetër që përgjigja duhet të kërkohet në Bruksel.
Pse mungoi ndërhyrja e Washingtonit?!
Sot, këtë e kanë të qartë të gjithë shqiptarët, dhe përgjigja duhet të kërkohet në Tiranë dhe Prishtinë! Ashtu siç duhet të kërkohet përgjigja pse tashmë në dy shtetet shqiptare mungon demokracia dhe lufta kundër korrupsionit!
Për ata që duan ta quajnë rastësi, vizitën e Përfaqësuesit special të Presidentit të SHBA për dialogun Kosovë-Serbi, Ambasadorit Richard Grenell në Prishtinë dhe vajtjen e Ambasadores së re të SHBA në Shqipëri, Yuri Kim, mund edhe ta bëjnë, por shqiptarët vetëm rastësi nuk e konsiderojnë.
Presidenti Trump i dha mesazh të qartë Beogradit dhe Prishtinës se “Çështja e Kosovës” do të zgjidhet shumë shpejtë, dhe nëse dikush mendon se Presidenti i shtetit më të fuqishëm në botë do të angazhohej për një linjë ajrore të dy shteteve që nuk kanë njohje të ndërsjellë, vetëm që të qarkullojnë njerëzit dhe mallrat, ka problem jo vetëm me njohjen e çështjes por edhe të kombit shqiptar!
Ndërkohë dita e parë e punës e Ambasadores Kim në Tiranë ngjallë shpresën te shqiptarët jo vetëm se kemi të bëjmë me një ambasadore amerikane, por për një përfaqësuese të një fryme të re diplomatike.
Skeptikët e politikës së Presidentit Trump kishin shumë të panjohura për sanksionet ekonomike me të cilat ai filloi luftën me liderët e marrë botëror. Por zbrapsja e “Kinës së Madhe” dhe këto ditë edhe Bashkimit Europian i dha të drejtë njeriut të parë të shtetit me më së shumti konsumatorë të fuqishëm ekonomik, që nuk quhet kot, Amerikë. Epilogun e konfliktit ekonomik me Kinën Presidenti i SHBA, Donald Trump, e kishte të qartë por me reflektimin e lidershipit kinez për ti zgjatur dorën e pajtimit nuk e bëri atë të shfaqet si triumfator i madh. Duke e mirëprit, Presidenti Trump paralajmëroi ditë më të mira për tregtinë globale që menjëherë filloi të shënoi hapa të paparë në bursat botërore në dhjetëra vitet e fundit.
Po, sot shqiptarët jetojnë në Shqipëri dhe Kosovë aty ku mungon demokracia dhe nuk luftohet korrupsioni, por bazuar në të kaluarën e krijimit dhe zhvillimit të kombit shqiptar, atyre me të drejtë iu kthye edhe shpresa me ardhjen e Ambasadores Kim përkatësisht Abasadorit Grenell si njerëz të Presidentit Trump. Arsyeja është e thjeshtë:
Shpresa për shqiptarët vdes, vetëm kur nuk do të ketë më Amerikë!
