BE firmos marrëveshjen për Brexit

Presidentja e Komisionit Evropian, Ursula von der Leyen, dhe presidenti i Këshillit Evropian, Charles Michel, firmosën sot marrëveshjen për Brexit apo largimin e Mbretërisë së Bashkuar nga BE-ja, javën e ardhshme.

Ceremonia e firmosjes është hapi i parafundit në Brexit, i cili u mbajt pa praninë e mediave.

“Gjërat do të ndryshojnë pashmangshëm, por miqësia jonë do të mbetet. Ne do të nisim një kapitull të ri si partnerë dhe aleatë”, tha Michel përmes një postim në rrejtin social Twitter.

Edhe Komisioni Evropian, edhe Këshilli Evropian i refuzuan kërkesat e vazhdueshme të mediave për të marrë pjesë në ceremoninë e nënshkrimit.

“Charles Michel dhe unë sapo nënshkruam Marrëveshjen e Tërheqjes së Mbretërisë së Bashkuar nga Bashkimi Evropian, duke i hapur rrugë ratifikimit të saj në Parlamentin Evropian,” tha Von der Leyen përmes rrjetit social Twitter.

Parlamenti Europian pritet ta ratifikojë marrëveshjen për Brexit më 29 janar, duke i hequr Britanisë edhe pengesën e fundit për dalje nga blloku, më 31 janar, raporton RFE.

Ndryshe, qytetarët britanikë kanë vendosur për Brexit-in në një referendum të mbajtur në vitin 2016.

Pas 31 janarit do të nisë edhe periudha e tranzicionit, e cila do t’iu japë palëve kohë së paku deri më 31 dhjetor, 2020, për të negociuar marrëdhënien e ardhshme.

Teksti ligjor i marrëveshjes që specifikon detajet e largimit të Britanisë nga BE-ja përfshin më shumë se 500 faqe.