Rakiç: Lista Srpska nuk e voton Qeverinë e re të Kosovës

Kryetari i Listës Srpska, Goran Rakiç ka deklaruar sot në Beograd pas konsultimeve me Qeverinë e Serbisë, se subjekti politik që ai përfaqëson është ftuar vetëm njëherë në konsultime për Qeverinë e re të Kosovës.

“Kemi mësuar nga mediat se është arritur njëfarë koalicioni dhe kemi vendosur të mos e përkrahim atë qeveri ngase i besojmë vetëm Beogradit,” tha Rakiç, pas takimit me kryeministren serbe Ana Bërnabiq dhe Drejtorin e Zyrës për Kosovën në qeverinë e Serbisëe, Marko Gjuriç, raporton RFE.

“Nuk ka kushte që Lista Srpska ta votojë qeverinë e re, por do të marrë pjesë në institucione dhe do ta përmbushë mandatin e vet,” tha Gjuriç.

Ndryshe, Lëvizja Vetëvendosje dhe Lidhja Demokratike e Kosovës kanë nënshkruar sot marrëveshjen për koalicionin e ardhshëm qeverisës në Kosovë.

Më 3 shkurt, në seancën plenare të thirrur nga i mandatuari për kryeministër, Albin Kurti, pritet të votohet për Qeverinë e ardhshme të Kosovës, të udhëhequr nga LVV dhe LDK.