Kosova me Qeveri të Re, Kryeministër Albin Kurti

Me 66 vota për dhe 10 abstenime, Parlamenti i Kosovës votoi Qeverinë e re me Kryeministër Albin Kurti.

Para votimit, Albin Kurti, prezantoi programin qeverisës dhe kabinetin e e qeverisë që do të drejtoj.

Fillimisht Albin Kurti tha se qeveria e tij do të jetë Qeveri e kursimit të parasë publike ndërsa paralajmëroi se buxheti i shtetit do të arrijë deri ne 3 miliardë euro.

“Do të jemi Qeveri e kursimit të parasë publike. Para meje do të jenë 15 ministra dhe jo 21 ministra siç ishin më herët. Me pak shpenzime në poste e më shumë në projekte. Do të depolitizohen ndërmarrjet publike.

Do të jemi Qeveri e ekonomisë, do të hapemi vende të reja të punës. Qeveria do të punojë në zgjerimin e eksportit. Do të rrisim transparencën. Agjencia Kosovare e Privatizimit do të shuhet dhe të transformohet si agjenci brenda Qeverisë,” tha Albin Kurti ndërsa foli dhe për plagën më të madhe, papunësinë:

“Do të marrim masa që ndikojnë në punësimin e të rinjve dhe grave. Do të bëjmë subvencionimin e pagave të sektorit privat. Do të jetësojmë grantin e katër për komuna. Më shumë qasje në financa, pa monopole e më shumë mbrojte e qasje që të rrisim punësimin. Për punëtoret më shumë të drejta, 40 orë në javë për punëtorin do të shtojmë numrin e inspektorëve për 400.

Buxheti i shtetit do të arrijë në 3 miliardë euro. Do të niset një program i punësimit. Do të evitohen të gjitha keqpërdorimet financiare. Do të mbështesim edhe bujqësinë,” tha Albin Kurti ndërkohë theksoi dhe risitë e kësaj qeverisje si shërbimi ushtarak i detyrueshëm prej tre muajsh, si dhe inicimi për dënimin e krimeve të luftës.

Këtë program qeverisës, Albin Kurti u zotua se do ta zabtoj me këtë kabinet qeveritar:

Zv/Kryeministër i parë – Avdullah Hoti

Zv/kryeministër i dytë – Haki Abazi

Ministër i Punëve të Jashtme – Glauk Konjufca

Ministër i Integrimeve Evropiane – Blerim Reka

Ministre e Drejtësisë – Albulena Haxhiu

Ministre e Arsimit – Hykmete Bajrami

Ministër i Financave – Besnik Bislimi

Ministër i Punëve të Brendshme – Agim Veliu

Ministre e Ekonomisë – Rozeta Hajdari

Ministër i Mbrojtjes – Anton Quni

Ministër i Infrastrukturës – Lumir Abdixhiku

Ministër i Shëndetësisë – Arben Vitia

Ministër i Bujqësisë – Besian Mustafa

Ministre e Kulturës, Rinisë dhe Sportit – Vlora Dumoshi