Mbledhja e parë, Kryeministri Kurti: Qeverisja jonë, pasqyrë ku qytetarët duan ta shohin veten!

Kryeministri i ri i Kosovës, Albin Kurti, në mbledhje e tij të parë duke iu drejtuar ministrave tha se qeverisja jonë është pasqyrë në të cilën qytetarët do të shohin vetveten.

Fillimisht, me një ceremoni solemne para Qeverisë së Kosovës, në mungesë të Ish-Kryeministrit, Ramush Haradinaj, Ish-Zv/kryeministri Behgjet Pacolli i dorëzoi postin Kryeministrit të zgjedhur, Albin Kurti.

Hapat e parë drejtë Qeverisë, Kryeministri i ri i bëri mbi tapetin e kuq dhe nën interpretimin e himnit shtetëror të Kosovës, ku u përshëndet nga Garda ceremoniale e Forcave të Sigurisë së Kosovës.

Pas kësaj ceremonie, në ambientet e kabinetit të kryeministrit u zhvillua dhe takimi në mes të Ish-Zv/kryeministrit, Behgjet Pacolli dhe Kryeministrit Albin Kurti, ku u bë dhe pranim-dorëzimi formal i detyrës së Kryeministrit të Kosovës.

Pasi mori detyrën, nga Zv/Kryeministri Bexhet Pacolli, Kryeministri i ri i Kosovës, Albin Kurti, zhvilloi dhe mbledhjen e tij të parë ku kabinetit të tij qeveritar i bëri të qartë se takimet do të jenë të shpeshta e të shumta që ta koordinojmë punën.

“Mos të harrojmë, qeverisja jonë është pasqyrë në të cilën qytetarët do të shohin vetveten, të jetë kjo pamje që ata duan ta shohin vazhdimisht,” u shpreh Albin Kurti ndërsa foli edhe për 100 ditët e para:

“100 ditët e para do të jenë ditë të zëna me angazhim dhe përkushtim maksimal, karriget i kemi por më shumë do të rrimë në këmbë, programi ynë është ambicioz, por edhe pritjet e qytetarëve. Sytë e të gjithë popullit janë tek ky kabinet qeverisës. Mandati duhet të jetë më shumë për të shërbyer e jo për të urdhëruar. Shanset për sukses i kemi të mëdha.”

“Do të ishte mirë që të gjithë ne të mësojmë përmendësh programin tonë që del nga marrëveshja jonë e përbashkët sepse me të do të zgjohemi në mëngjes e më të do të flemë në mbrëmje. Le të bëhemi të thjeshtë e të drejtë ashtu siç i kemi qytetarët tanë që janë aq të mirë,” tha Albin Kurti
duke shtuar se ministri i Bujqësisë duhet të kalojë më shumë kohë me fermerët e ministri i shëndetësisë më shumë kohë me mjekë e pacientë se sa në zyrat e tyre.

“Pra, jo të rrimë ulur në kolltuqe e të urdhërojmë nga lart, por të zbresim poshtë sa më afër te qytetari sepse atje është e vërteta jonë dhe atje shihen politikat tona. Mandati mund të jetë edhe privilegj, por është mirë që ta kuptojmë si privilegj për të shërbyer e jo për të urdhëruar. Jepni kuptim pozitës së ministrit çfarë s’ka pasur asnjëherë në Kosovën e pasluftës. Shanset për sukses i kemi të mëdha, por duhet të punojmë si ekip. Sukseset dhe dështimet janë kolektive e jo personale e aq më pak partiake. Partitë i kemi në parlament, atje janë grupet tona parlamentare, këtu punojmë si ekip,” tha Kryeministri i ri i Kosovës duke e bërë të qartë:

“Në këtë qeveri nuk do të ketë LVV, LDK, NDS e LS. Do të jemi qeveria e Republikës së Kosovës që punon bashkë për të mirën e përbashkët.”