31-vjetori i grevës në Stan Tërg, Osmani: Minatorët i lëkundën themelet e Jugosllavisë!

Greva e minatorëve të Trepçës shërbeu për sensibilizim qytetar dhe me angazhimin e tyre vetëmohues, minatorët i lëkundën themelet e Jugosllavisë, tha Kryetarja e Parlamentit të Kosovës, Vjosa Osmani me rastin e shënimit të 31-vjetorit të grevës në Stan Tërg, sot kur ky aset strategjik i Kosovës, përballet me sfidën e zhvillimit ndërsa premtoi angazhimin institucional për përmirësimin e kushteve të punës për minatorët.

“Në kontekstin historik, greva e minatorëve të Trepçës mund të trajtohet në dy rrafshe, si rezistencë aktive paqësore për të mbrojtur ekzistencën e popullit shqiptar në periudhën e okupimit klasik nga Serbia dhe, së dyti, si rezistencë ndaj suprimimit arbitrar të autonomisë së Kosovës.”

Minatorët e Trepçës e donin Republikën, tha Kryetarja e Parlamentit, prandaj e ngritën fuqishëm zërin ndaj okupuesit dhe kundër ndryshimeve kushtetuese te asaj kohe.

“Ngjashëm edhe sot, minatorët dëshirojnë mbrojtjen e pavarësisë se Kosovës, integritetin territorial, sovranitetin e vendit dhe dinjitetin qytetar. Falë kësaj sakrifice dhe vlerave të cilat na udhëhoqën e që përkrah nesh i rreshtuan shtetet demokratike të botës, kjo ëndërr është realizuar dhe pavarësia e Kosovës është e pakthyeshme. Trepça është e paprekshme.”