M’rrove, t’rrova. Sot, brisku i Albin Kurtit!

nga Agim Popoci

Populli shqiptar i Kosovës, pa fajin e tyre, për disa vjet po i nënshtrohet një centrifuge mediatike, spiunazhi dhe injorance, sa gjithçka çfarë vërtitet rreth këtij shteti duket se është kundër shqiptarëve.

Me ose pa dashje, protagonistët e kësaj situate të krijuar po sjellin propozime nga më të ndryshmet për zgjidhjen e çështjes Kosovë-Serbi, sa ende nuk kemi asnjë përballje shqiptare që buron nga reflektimi. Madje edhe relaksi është i pamundur kur këto broçkulla i publikojnë buzhalët si ekskluzive, ndonëse zhvlerësohen sapo e kuptojnë shqiptarët se kush është transmetuesi i këtyre dashamirësve të Kosovës, që e duan zgjidhjen e çështjes me Serbinë!

Sot na del një Edward Joseph si profesor i Universitetit “Johns Hopkins” në Washington për të fol mbi përpjekjet e të dërguarit të Presidentit Trump, Richard Grenell, duke i shkelur me këmbë ato sepse, thotë ai, bëhet fjalë për Marrëveshje mbi ndarjen e Kosovës ndërkohë jep një zgjidhje, vetëm sipas tij, fatlume, që nuk ka lidhje me realitetin edhe pse korri sukses në Maqedoni të Veriut.

Ndonëse opinioni publik në Kosovë u tremb dhe intervistën e tij e priti në panik, ky nuk është vetëm një profesor, ky është Ish-zëvendësshefi i OSBE-së në Kosovë, i cili, jo para një shekulli, por, Qershorin e vitit 2013 i bënte thirrje Albin Kurtit ta pranon Marrëveshjen për normalizimin e Marrëdhënieve me Serbinë dhe përmes një letre e këshillon të heq dorë nga pozicionet politike të Vetëvendosjes nëse do bashkëpunimin me SHBA-në. Dhe, letra e Ambasadorit Joseph në vitin 2013, ashtu si mesazhet e Ambasadorit Grenell publikohen nga buzhalët. Po çfarë thoshte Ambasadori Joseph në memon me pesë pika, që nuk thotë sot?!

“Më lejoni të ndaj 5 pika për të cilat shpresoj se do t’i keni në konsideratë,” shkruan Joseph duke thënë se mund të ketë liri të shprehjes, por ajo mund t’i ketë kostot e saj. Edhe nëse i fitoni zgjedhjet, ju do ta humbisni kredibilitetin atëherë kur propozimi juaj për bashkim nuk do të shkojë askund.
1. Fjala mund të jetë e lirë, por qëndrimet kanë koston e tyre

2. Sado të bindur që të jeni në lidhje me vlerat e bashkimit me Shqipërinë, ju po e ekspozoni vetën ndaj një përçmimi të mundshëm politik

3. Ndaluni së protestuari për pavarësinë e kufizuar

4. SHBA-të shqetësohen shumë për kushtet e komunitetit serb në Kosovë, ashtu siç duhet të shqetësoheni edhe ju

5. Ndaluni së sulmuari marrëveshjen e 19 prillit, shikoni të gjeni rrugë për tu siguruar se po implementohet si duhet

Si përfundoi Marrëveshja e 19 Prillit tashmë është e qartë ashtu si dhe trajektorja politike e Albin Kurtit kur sot po mundohet të korrigjoj vendimin për vendosjen e taksës për produktet serbe, politikën për toke të Ramush Haradinajt dhe HashimThaçit, ashtu si dhe të josephëve e grenellëve me buzhalët.

Sot I dërguari i Presidentit Trump, Ambasadori Richard Grenell, mund të kujtohet para së të bjerë me fjet gjumë ti thotë Kryeministrit Albin Kurtit ta heq taksën ndaj produkteve serbe. Madje edhe kur zgjohet nga gjumi, me qëllimin e mirë të zgjidhjes së problemit Kosovë-Serbi!

Sot edhe Ish-Zëvendësshef i OSBE-së në Kosovë, Edward Joseph ndonëse diplomat amerikan, mund të bëjë përpjekje në minimin e angazhimit të Ambasadorit Grenell duke fol për ndarjen e Kosovës dhe mundësisë së zgjidhjes së çështjes me leksionin nga Marrëveshja e Prespës!

Por, mesazhet e Ambasadorit Grenell dhe atij Joseph nga frëngjia e buzhalëve duhet të formulohen duke pasur parasysh se Albin Kurtit nuk iu besua pushteti për të mos e hequr taksën por për ta kuruar këtë vendim me reciprocitetin të cilin nuk e shuan Kurti por Serbia me vullnetin e saj.

Dhe, Albin Kurtit nuk iu besua pushteti për t’u armiqësuar me SHBA, por që së bashku me Shtetet e Bashkuara si aleaten kryesore, ta krijojnë një shtet stabël  i cili u pengua ashtu si dhe Kurti e Lëvizja Vetëvendosje, vetëm nga kjo frëngji, që sot mundohet ti çon shqiptarët drejt një hullie që i shërben vetëm Beogradit.

Ndërkohë diplomati amerikan Joseph, i cili nuk mund të quhet mosnjohës i çështjes së Kosovës ashtu siç u krijua bindja ndër kosovarë për Ambasadorin Grenell, me hyzmetin që i bënë buzhalët, nuk duhet të nxjerr nga goja propozime si ajo e Marrëveshjes së Prespës kur nuk ka asnjë lidhje me çështjen Kosovë-Serbi. Greqia nuk kishte pretendime territoriale ndaj Maqedonisë dhe gjithçka përfundoi me ndryshimin e emrit, problem ky që nuk ekziston në rastin e Kosovës. Për Serbinë ekziston Kosova e Metohija, dhe askush nuk e ndalon ta mendoj këtë gjë, ndërkohë kemi shtetin më të ri në Evropë që quhet Kosovë, dhe nuk prek idiotizmin serb ashtu siç prek të menduarit jologjik ose të qëllimshëm të diplomatit Joseph.

Në fund, Ambasadorët Grenell dhe Joseph lehtësisht mund të vijnë në përfundim, bazuar në sjelljen e Albin Kurtit deri më sot, se cili është qëllimi i tij!

I dërguari Richard Grenell nuk u kryqëzua si Robert Gelbard ndonëse veprimet e tij shumë pak dallonin nga ato të dërguarit Gelbard në vitin 1998, dhe kjo ka një përgjigje. Sot, Albin Kurti reagon si burrështeti dhe nuk e humb besimin në SHBA bazuar në gjykimin e ditës së një Ambasadori amerikan, që e shikon në tryezë Hashim Thaçin që nuk ka asnjë votë ndërsa shpërfill njeriun më të votuar në Kosovë, si në Berlin ashtu dhe në Washington.

Ish-zëvendësshefi i OSBE-së në Kosovë, Edward Joseph në vitin 2013 thoshte se SHBA nuk do ta mbështesë Albin Kurtin nëse ai kërkon bashkimin me Shqipërinë dhe nuk respekton Marrëveshjn e Prillit për normalizimin e marrëdhënieve me Serbinë. Sot kur Albin Kurti nuk flet për bashkim por për zbatimin e Marrëveshjes  për normalizimin e marrëdhënieve Kosovë-Serbi , duke e pranuar madje edhe reciprocitetin e Pikave të Marrëveshjes që i zbaton Serbia duke mos pretenduar ato në plotni ndonëse tashmë kanë detyrime ndërkombëtare, diplomati Joseph, meqë partia që ai adhuron nuk është në pushtet dhe Kurti sërish sulmohet, flet për përpjekjen e ndarjes së Kosovës po nga ajo SHBA për të cilën 7 vjet më parë thoshte se “Kosova pothuajse gjithë pavarësinë e saj ia ka borxh”. Për dallim nga buzhalët dhe josephët, Kryeministrin Albin Kurti e respekton këtë fakt pavarësisht nëse në pushtet janë demokratët ose republikanët, përkundër nivelit të afirmitetit që ka me këto parti!

Për të mos harruar edhe një detaj. Nuk dihet se cili ishte qëllimi i fotos që Ambasadori Grenell publikoi nga Shtëpia e Bardhë e ku Kosova përfaqësohej nga Hashim Thaçi dhe Bekim Çollaku. Por, mirë bëri që e publikoi, sepse shqiptarët vetëm përmes asaj fotoje u qetësuan duke e projektuar në mendjen e tyre një Kosovë që mund të ndahet, siç tha Edward Joseph, nga Thaçi dhe Çollaku të  kapardisur përballë Vuçiçit, dhe cili do të jetë fati I Kosovës kur aty do të jenë Albin Kurti dhe Vjosa Osmani.

Që nga viti 2011, me raste, Hashim Thaçi dhe Aleksandar Vuçiç kanë rruar njëri-tjetrin. Sot, pak rëndësi ka kjo, brisku është në duart e Albin Kurtit!