S’ka urbanë në Tiranë dhe Durrës, Rama: Transport i dedikuar për mjekë e infermierë!

Pas paralajmërimit të djeshëm të Kryeministri Edi Rama dhe vendimit të Bashkisë Tiranë për pezullimin e transportit urban nga dita e sotme, në mëngjes kanë funksionuar disa linja por menjëherë ka reaguar Kryeministri duke e bërë të qartë se nga mesita nuk ka transport urban.

“Nga sot në mesditë nuk ka transport urban në Tiranë dhe Durrës. Po bëjmë gati transportin e dedikuar për mjekët dhe infermierët,” thekson në reagimin e tij përmes rrjetit social Facebook Kryeministri Edi Rama.

Vendimi i Bashkise se Tirane

 Në vijim të planit të masave mbrojtëse në qytetin e Tiranës, me qëllim parandalimin e përhapjes së virusit COVID-19, Bashkia e Tiranës njofton të gjithë qytetarët se nga dita e enjte, datë 12 mars, do të pezullohet shërbimi i transportit publik për një afat të pacaktuar.

Për sa më sipër, prej orës 05:00 të ditës së nesërme, këto linja do të ndërpriten deri në një njoftim të dytë:

– Shërbimi i transportit qytetas (linjat brenda qytetit të Tiranës);

– Shërbimi i transportit rrethqytetas (linjat që lidhin qytetin e Tiranës me ish njësitë administrative/ komunat);

– Shërbimi i transportit ndërqytetas ushqyes (linjat që lidhin Bashkinë e Tiranës me Bashkinë e Kamzës dhe Bashkinë e Vorës).

Bashkia e Tiranës kërkon mirëkuptimin e qytetarëve për masën e pezullimit të përkohshëm të këtyre shërbimive të transportit, por gjykon se masa është e domosdoshme për të rritur efiçencën e sistemit të mbrojtjes ndaj përhapjes së mëtejshme të virusit.