Masat ndaj koronavirusit/ Policia kontrolle në rrugë, 509 të ndëshkuar dhe 76 të shoqëruar, bllokohen disa automjete

Policia e Shtetit së bashku me Forcat e Armatosura që nga ora 6:00 e mëngjesit vijojnë kontrollet intensive në rrugët e qyteteve, ku bazuar në masat e qeverisë kundër përhapjes së koronavirusit, është ndaluar lëvizja me automjete. Mësohet se janë 509 të ndëshkuar dhe 76 persona të shoqëruar për mosbindje, pasi kanë lëvizur në rrugë me makina private ndërkohë raprtohet edhe për makina të bllokuara.

Përkundër këtyre rasteve, shumica e shqiptarëve i janë bindur masave, duke qëndruar në shtëpi për parandalimin e përhapjes së koronavirusit.

Lidhur me ecurinë e zbatimit të këtyre masave është shprehur i kënaqur edhe Kryeministri Edi Rama:

“Super start i kësaj dite të parë në mbrojtje të vetes, familjes dhe njëri-tjetrit në një luftë të paparë nervash, ku të vetmet armë që kemi janë mirëkuptimi, solidariteti dhe durimi, durimi, durimi. Policia e Shtetit vijon të sigurojë regjimin e mosqarkullimit së bashku me Forcat e Armatosura,” thekson Edi Rama përmes rrjetit social Facebook duke kërkar sërish ndjesë 1000 herë ndërsa përfundon:

Kjo luftë nuk fitohet ndryshe!

Njoftimi i policisë:

Policia e Shtetit

Kush thyen rregullin, përballet me ligjin.

509 drejtues mjetesh të ndëshkuar për mosrespektim të urdhrit të dhënë për ndalim qarkullimi të automjeteve.

Në zbatim të masave shtesë për të mos lejuar qarkullimin e mjeteve, me qëllim parandalimin e përhapjes së COVID-19, prej orës 06:00 të mëngjesit të sotëm, shërbimet e Policisë së Shtetit, në bashkëpunim me ato të ushtrisë, vijojnë kontrollin e zbatimit të këtyre masave shtesë.

Në këtë kuadër, prej orës 06:00, deri në orën 12:00, janë shoqëruar një numër i konsiderueshëm drejtuesish të mjeteve, të cilët nuk kanë respektuar urdhrin e dhënë për ndalim qarkullimi të automjeteve, në qytetet Tiranë, Durrës, Fier, Vlorë, Elbasan, Lezhë e Shkodër.

Konkretisht, janë evidentuar nga shërbimet e Policisë:

– në DVP Tiranë 171 drejtues mjetesh
– në DVP Durrës 77 drejtues mjetesh
– në DVP Fier 54 drejtues mjetesh
– në DVP Vlorë 53 drejtues mjetesh
– në DVP Lezhë 61 drejtues mjetesh
– në DVP Shkodër 45 drejtues mjetesh
– në DVP Elbasan 48 drejtues mjetesh.

Ndaj këtyre drejtuesve është vendosur kufizimi i lëvizjes, si dhe po kryhen veprimet administrative sipas parashikimeve të nenit 7, paragrafi 12 i Ligjit Nr. 8378, datë 22.07.1998, Kodi Rrugor i Republikës së Shqipërisë (i ndryshuar).

76 drejtues mjetesh janë të shoqëruar në ambientet e Komisariateve të DVP-ve, pasi kanë kundërshtuar punonjësit e Policisë për masën administrative, për thyerjen e urdhrit për ndalim qarkullimi të automjeteve dhe po këtyre drejtueseve u janë bllokuar edhe automjetet.

Policia e Shtetit apelon edhe njëherë për të respektuar kufizimin e lëvizjes sipas njoftimit, me qëllim parandalimin e përhapjes së COVID-19, pasi në të kundërt cilido që do shkelë këto urdhra, do përballet me sanksionet ligjore.