Edhe 4 të prekur, 13 të infektuar me koronavirus në Kosovë

Ministri i Shëndetësisë i Kosovës, Arben Vitia, ka bërë të ditur sot se është rritur numri i të prekurve nga koronavirusi, dhe se katër të infektuarit e rinj janë nga fshati Stubëll i Vitisë.

“Mbrëmë vonë, bazuar në rezultatet e testimeve u konfirmuan edhe katër raste të reja pozitive me COVID-19. Të katër rastet janë nga fshati Stubëll e Vitisë, familjarë të ngushtë të pacientit të diagnostikuar pozitiv me COVID-19, me datë 13.03.2020. E gjithë familja kanë qenë në vetizolim dhe Instituti Kombëtar i Shëndetit Publik ka bërë testimin edhe të familjarëve të tjerë,” thekson ministri Vitia duke bërë thirrje për kujdes të shtuar.

“Në këtë situatë vetëdija dhe ndihma e juaj është e domosdoshme. Mbani distancë nga tjetri. Reduktoni daljet veç në raste emergjente. Ndiqni rekomandimet nga Ministria e Shëndetësisë dhe Instituti Kombëtar i Shëndetit Publik.”

Në më pak se katër ditë numri i të prekurve nga virusi ka arritur në 13 zonat e prekura janë Vitia me 7 pacientë Malisheva me 4 pacientë, Podujeva me 1 pacient dhe Klina me 1 pacient.

Krasniqi: Gjendja shëndetësore e të prekurve me COVID-19 është stabël

Infektologu Valbon Krasniqi tha për RFE se gjendja shëndetësore e të prekurve me koronavirus është stabile.

Vetëm një person i prekur me këtë virus, i moshës 77-vjeçare, kohë pas kohe ka nevojë për oksigjen, tha ai.

“Edhe përkundër asaj se një i prekur me COVID-19 ka nevojë për oksigjen, gjendja shëndetësore është aktualisht stabile. Edhe dymbëdhjetë të tjerët, të prekur me koronavirusin e ri, janë në gjendje të mirë shëndetësore, duke u trajtuar në Klinikën Infektive”, tha Krasniqi.

Të prekurit me koronavirus janë nga Komuna e Vitisë, e Klinës, e Malishevës, e Podujevës, si dhe një shtetase italiane.