Konfiskohen rreth 700 mijë maska

Autoritetet çeke kanë konfiskuar rreth 700 mijë maska të destinuara për luftën kundër koronavirusit nga kompania e cila filloi të kërkoi çmim më të lartë, tha ministri i Punëve të Brendshme të Çekisë, Jan Hamaçek.

Çekia, ku së fundi janë raportuar 434 raste me koronavirus, po përballet me mungesë të madhe të maskave dhe respiratorëve, arsye kjo që ka bërë që qytetarët të fillojnë prodhimin e tyre në shtëpi.

“Policia po lufton kundër përfituesve,” tha Hamaçek përmes rrjetit social Twitter duke shtuar:

“Kompania është dashur të bëjë furnizimin për punëtorët shëndetësor, por në momentin e fundit ka dashur ta rris çmimin.”

Hamaçek me kryeministrin Andrej Babish, ka kërkuar falje dje që nuk kanë arritur të sigurojnë pajisje të duhura mbrojtëse, në veçanti për personelin në spitale ku ndodhen të infektuarit me koronavirus.

Ndërkohë grupi “Çekia çepë maska”, e cila prodhon dhe furnizon me pajisje mbrojtëse ata që kanë nevojë, tashmë ka 25 mijë ndjekës në rrjetin social Facebook.

Ndryshe, qeveria çeke të shtunën ka urdhëruar mbylljen e dyqaneve, restoranteve, pubeve në përpjekje për të kufizuar përhapjen e koronavirusit ndërsa kishte mbyllur më parë shkollat, kinematë, teatrot, galeritë etj. ndërsa ka ndaluar tubimin e më shumë se 30 personave duke përjashtuar ceremonitë mortore.