Kurba e rasteve me COVID-19 s’po rritet, Rama: Do dalim nga lufta…

Nën alarm dhe me doza pa fund pesimizmi, Kryeministri Edi Rama në komunikimin e tij të fundjavës, duke ju përgjigjur kritikëve për luftën kundër koronavirusit, tha se bëri më të mirën e mundshme dhe se është më i vendosur se kurrë të mbrojë jetën e çdo shqiptari në luftë me COVID-19. Për herë të parë, nga momenti që koronavirusi preku Shqipërinë, qytetarët arritën të dëgjojnë nga Kryeministri i tyre edhe një argument shprese. Fakti që kurba e rasteve të reja me COVID-19 nuk po rritet, do të thotë se ka funksionuar rezistenca e shqiptarëve. Falë rezistencës tuaj, tha Kryeministri Edi Rama ne do t’ja dalim, do t’ja dalim më shpejt se shumë të tjerë.

“Kush ju tha që është histori që mbaron për 2 javë dhe më pas do dalim të përqafohemi? Edhe Amerika që thoshte se ky virus do ikë vetë tani po tejkalon Kinën për rastet e të prekurve, mirë Amerika është Amerikë, por neve duhet ta kuptojmë që jemi në emergjëncë, kjo nuk është lojë kukafshehtasi. Ka disa që nuk duan të dëgjojnë dhe të kuptojnë të vërtetën. Unë di se po vazhduam kështu do ta kalojmë pa qindra mijëra viktima dhe do t’i hapim pjesë pjesë rrugët e jetës, por po u lëshuam me të dalë ku të dalë ne do bëhemi gazi i këtij planeti. Kësja radhe jam më i vendosur se kurrë të mbroj jetën e cdo shqiptari, me çdo mjet. Familja jonë e madhe, Shqipëria nuk mund të gjunjëzohet e turpërohet në këtë luftë. Turpi do ju mbetet atyre që një fjalë të mirë nuk e thonë dot por nxjerrin nga goja vec vrerë,” tha Edi Rama ndërsa e pranon se qëndrimi në shtëpi ka dhënë rezultate.

“Falë rezistencës tuaj ne do t’ja dalim, do t’ja dalim më shpejt se shumë të tjerë, se i morëm masat në kohën e duhur. Ne i rezistojmë dhe i respektojmë të gjitha masat. Ajo kurba që nuk po rritet është rezultat i kësaj rezistence, që të ecim para ka vetëm një rrugë: rezistencë për ekzistencë.”

Biznesi i vogël merr pagën e luftës në fillim të prillit

Sidoqoftë edhe pak fjalëve të mira Kryeministri Edi Rama sërish përsëriti se jemi në luftë, kishte ca replika për kritikët ndërsa për biznesin e vogël tha se në fillim të prillit do marrë pagën e luftës ashtu si edhe ndihma ekonomike e dyfishuar për familjet në nevojë.

“Sot iluzionet nuk zhgënjejnë por mund të vrasin njerëz. Si ka mundësi që të mos doni ta kuptoni se ky shtet asnjë shtet nuk mund të garantojë zhvillimin normal të jetës së askujt por duhet të garantojë si çdo shtet mbrojtjen e jetës së secilit në këtë luftë. Apo mos kujtoni se këto shifrat që shyqyr Zotit nuk janë alarmante dalin nga hiçi dhe jo nga masat. Po bëjmë gjënë e duhur. Për çfarë vdekjesh nga uria flasin disa kur nga uria shqiptarët nuk kanë vdekur kurrë sepse dhe në kohët më të zeza të historisë kanë mbajtur njërit-tjetrin. Për cilat qese me miell e oriz ankoheni kur këto pako nuk shkojnë tek njerëzit për festa. Pse nuk doni ta kuptoni se kjo është një luftë, luftë e pashoqe. E para luftë kur njerëzimi nuk e sulmon dot armikun por duhet vetëm të mbrohet. Pse nuk e kuptoni dot që nuk ka shtet në botë që i shkon dot çdo hallexhiu në derë.”

Por Edi Rama shprehë irritimin për të gjithë ata kritikë të reklamimit pa fund të punës së tij në rrjetet sociale dhe mediat që ka në shërbim, e që për fatin e keq të shqiptarëve, janë të gjitha me liçencë kombëtare.

“Ç’domethenë mos na trego video, mos bëj show, kur shikon pamje nga operacioni humanitar. Ja ku i keni qindra mijëra shqiptarë në Itali kush po i çon qese me ushqime në derë, kush po iu thotë mos paguani dritat se nuk keni punë. Pyetini dhe nëse Italia nuk ua mbush dot mendjen pse nuk pyesni miq e shokë në Angli, në Francë, në Amerikë po të doni se sa qese po marrin në shtëpi nga shteti. Për sa muaj ua kanë falur paratë e dritave e taksave. Flas për shqiptarët unë. Ne po bëjmë maksimumin e mundësive tona. Po të ishte dëshira dhe jo mundësia do kisha bërë shumë më tepër. Punon në të zezë dhe do lekë se je i papunë. Por si bëhet kjo kur nuk do të denoncosh as se në cilin biznes ke punuar. Pse nuk i pyesni ata në Itali çfarë fuqie ka fuqia e 5 ekonomike e globit sot.”

Dhe, Edi Rama vazhdon! Shyqyr o Zot që u shpik Facebooku dhe mundësia e tij për transmetimin e mesazhit edhe kur je Kryeministër i Shqipërisë:

“Ankoheni e shani pa pikën e vetëpërmbajtjes për pensionistët që nuk dinë të aplikojnë online. Pensionistët nuk aplikojnë dot sepse nuk do iu lejohet të dalin fare nga shtëpia. Ata që janë të vetmuar do t’i ndihmojmë ne.”

Meqë ky lloj komunikimi i jep mudësi Kryeministrit të flas deri në delir, Edi Rama nuk e lejon ti dështoj edhe ky rast. Deliranti që duam, vazhdon:

“Kur ra tërmeti e patë që ju dola për Zot. Nuk ia lashë Zotit asnjë nga detyrat e mia. Ju thashë të gjithë do iu ndihmojmë me pagën e luftës të tërë ata që janë në shtëpi se iu është mbyllur biznesi i vogël dhe javën e parë të prillit do të marrin lekët. Ju thashë se do iu dyfishojmë ndihmën ekonomike, dhe ata në javën e parë të prillit do të marrin lekët.

Ju thashë që në hyrje të prillit do indeksojmë pensionet do japim 20 mln euro plus për pensionistët. Si e keni hallin që rrini në shtëpi me një iPhone në dorë s’keni pensionistë dhe ankoheni për pensionistët.”