Dy viktima dhe 46 raste të reja me koronavirus në Maqedoninë e Veriut

Dy viktima dhe 46 raste të reja janë shënuar me koronavirus në Maqedoninë e Veriut.

Viktimat janë dy burra, njëri i moshës 68 vjeç nga Tetova dhe tjetri një 70-vjeçar nga Kumanova. Sipas njoftimit të Ministrisë së Shëndetësisë, ata ishin të sëmurë kronikë. Me dy viktimat e reja, numri i të vdekurve me koronavirus në Maqedoninë e Veriut ka arritur në 13.

Ndërkohë, raporton RFE, me 46 raste të reja ka shkuar në 430 numri i të infektuarve me COVID-19.

Prej tyre, 11 janë punonjës shëndetësorë në spitalin e Kumanovës. Tre nga të infektuarit janë nga reparti i rentgenit, tre nga reparti i kirurgjisë, një infermiere nga reparti i gjinekologjisë, një ndihmës dhe një mjek specializant nga reparti infektiv.

Drejtorja e Spitalit, Snezhana Zaharieva, tha se për gjendjen e krijuar është njoftuar Ministria Shëndetësisë, e cila pritet të dalë me masa, në ndihmë të spitalit.

Numri më i madh i të infektuarve me koronavirus është në Shkup, gjithsej 208 raste, kurse nga qytetet tjera me numrin më të madh janë: Kumanova (85), Dibra (49) dhe Prilepi (22).