Në Itali dhe Spanjë vazhdon të bie numri i të infektuarve nga COVID-19

Numri i vdekjeve nga COVID-19 në Itali ka rënë sërish në 24 orët e fundit.

Të premten autoritetet njoftuan për 570 vdekje të reja, derisa një ditë më parë kishin njoftuar për 610.

Numri i rasteve të reja me COVID-19 gjithashtu shënoi rënie, pasi u raportuan 3,951, ndërsa një ditë më parë ishin konfirmuar 4,204 raste.

Numri i përgjithshëm i vdekjeve që nga shpërthimi i pandemisë, më 21 shkurt, ka arritur në 18.849, tha Mbrojtja Civile e Italisë.

Gjithsej, raste të të infektuarve në këtë vend janë 147,577, shifër kjo që e rradhit Italinë pas Shteteve të Bashkuara dhe Spanjës.

Numri i personave të vdekur nga koronavirusi në Spanjë ka shënuar sërish rënie, teksa brenda 24 orëve janë regjistruar 605 raste me fatalitet, ka thënë Ministria e Shëndëtësisë në këtë shtet.

Numri total i të vdekurve në Spanjë nga sëmundja Covid-19 që shkakton koronavirusi ka arritur në 15,843, ndërsa i të prekurve në 157,022.

Spanja është vendi i dytë pas Italisë për nga numri i vdekjeve për shkak të pandemisë me koronavirus.

Madridi mbetet rajoni i prekur më së keqi nga kjo sëmundje në këtë shtet.

Ndërkohë, deri më tani, raporton RFE, në Spanjë është bërë e ditur se 55,000 pacientë janë shëruar nga ky virus.

Aktualisht, numri i të vdekurve nga koronavirusi në botë e ka kaluar shifrën 100,000.

Sipas Universitetit John Hopkins, të infektuar llogaritet të jenë rreth 1.6 milionë njerëz. Numri i të shëruarve nga virusi ka arritur në 368,669.

Ndryshe, koronavirusi i ri besohet të ketë origjinën nga një treg në Wuhan të Kinës, ku shiten kafshët e egra. Rasti i parë u paraqit në Kinë, dhe virusi shpejt u përhap në mbarë botën. Vdekja e parë ndodhi në qytetin kinez, Vuhan, më 9 janar. U deshën 83 ditë që të regjistroheshin 50,000 vdekjet e para, dhe vetëm tetë të tjera që numri i tyre të rritej në 100,000.